हामी सबैकाे संसारन्यूज

काठमाडौं । सांसदहरुले स्टेट पार्टनरसिप प्रोग्राम (एसपीपी)लाई अस्वीकार गरिएको भनि पठाएको पत्र सार्वजनिक गर्न माग गरेका छन् । परराष्ट्रमन्त्री डा. नारायण खड्काले अमेरिकालाई कुटनीतिक माध्यमद्धारा साउन ९ मा नै पत्राचार गरिएको जवाफ सदनलाई दिएपछि सांसदहरुले पत्र सार्वजनिक माग गरेका हुन् ।

एमालेका सांसद सुर्यप्रसाद पाठकले अमेरिकालाई पठाइएको पत्र सार्वजनिक हुनुपर्ने बताए । संसदको निरन्तर दबाब पछि मात्रै सरकारले पत्र पठाएको भन्दै उनले जनतालाई विश्वस्त पार्नका निम्ति पनि पत्र सार्वजनिक हुनुपर्ने बताए ।

तर, मन्त्री खड्काले भने पत्र सार्वजनिक गर्ने कुरा घुमाउरो शैलीमा अस्वीकार गरे । उनले सरकार र सरकारका निर्णयहरुलाई विश्वास गर्न आग्रह गरे ।

“मन्त्रीपरिषद्ले औपचारिक रुपमा निर्णय गरेको छ, मन्त्रीको हैसियतमा मैंले सदनलाई जानकारी गराएको छ”, उनले संसदमा जवाफ दिँदै भने, “सार्वभौम सरकारलाई अविश्वास भयो । यो ट्रेण्ड राम्रो होइन ।”

गत असार ६ मा चौतर्फी दबाब भएपछि मन्त्रीपरिषद्ले एसपीपी अस्वीकार गर्ने निर्णय गरेको थियो । तर, सरकारले अस्वीकार गरिएको औपचारिक पत्र भने पठाउन अस्वीकार गर्दै आएको थियो ।

सम्बन्धित समाचार

संसदलाई परराष्ट्रमन्त्रीको जवाफ : एसपीपी कार्यान्वयन नगर्ने पत्र अमेरिकालाई पठाइसक्यौं