हामी सबैकाे संसारन्यूज

काठमाडौं । स्टेट पार्टनरसिप प्रोग्राम (एसपीपी)मा सहभागि नहुने अमेरिकालाई औपचारिक रुपमा पत्रचार गरिएको परराष्ट्रमन्त्री नारायण खड्काले जानकारी दिएका छन् । शुक्रबारको प्रतिनिधिसभा बैठकमा बोल्दै उनले साउन ९ गते नै परराष्ट्र मन्त्रालयले पत्राचार गरेको जानकारी दिए ।

“मिति २०७९ साउन ९ गते कूटनीतिक माध्यमबाट नेपालले एसपीपीलाई अघि नबढाउने निर्णय गरेको लिखित जानकारी अमेरिकी सिरकार समक्ष पठाएको जानकारी गराउन चाहन्छु”, मन्त्री खड्लाले संसदमा भनेका छन् ।

गत असार ६ मा बसेको मन्त्रीपरिषद् बैठकले एसपीपीलाई अस्वीकार गर्ने निर्णय गरेको थियो । बैठकले अमेरिकालाई अस्वीकार गरिएको औपचारिक जानकारी पत्रमार्फत गर्ने निर्णय पनि गरेको थियो । तर, एक महिना बित्दासमेत सरकारले पत्र नपठाएपछि संसदमा पटक–पटक पत्राचारबारे जानकारी गराउन माग उठ्दै आएको थियो ।

संसदमा बारम्बार प्रश्न उठेपछि सभामुख अग्निप्रसाद सापकोटाले पत्राचारबारे जानकारी गराउन सरकारलाई निर्देशन गरेको थियो ।