हामी सबैकाे संसारन्यूज

काठमाडौं । नेकपा एमालेकी सांसद डा.शिवमाया तुम्बाहाम्फेले बलात्कारको आरोप लागेका शिद्धबाबा संलग्न रहेको महायज्ञमा सरकारका मन्त्री र न्यायाधिश नै सहभागी भएर कानुनको बर्खिलाप गरेको भन्दै आपत्ति जनाएकी छन् ।

शुक्रबारको प्रतिनिधिसभा बैठकको विशेष समयमा बोल्दै पूर्वमन्त्री समेत रहेकी डा. तुम्बाहाम्फेले पशुपतिनाथको मन्दिर परिसरभित्र संचालन भइरहेको महायज्ञमा सुनसरी जिल्ला अदालतमा विचाराधिन रहेको मुद्दाका आरोपी, आफ्नै अनुयायीलाई बलात्कार गरेको आरोप लागेका व्यक्ति पनि संलग्न महायज्ञमा सरकारका मन्त्री नै सहभागी भएकोमा आपत्ति जनाएकी हुन् ।

‘हामीलाई अदालतमा विचाराधिन रहेको मुद्दामा भन्नु केही छैन । तर सो मुद्दासँग जोडिएका व्यक्ति जसलाई हामीले कृष्ण बहादुर गिरी ‘शिद्धबाबा’ भनेर चिन्ने गरेका छौं,’ सांसद तुम्बाहाम्फेले भनिन्, ‘ती व्यक्ति जोडिएको महायज्ञमा हाम्रा सरकारका मन्त्री सरकारी वकिलको प्रमुख पदमा बसेका महान्याधिवक्त समेत सो महायज्ञमा उपस्थित जनाउँदा यो मुलुकका नेपाली महिलाहरु तथा जनताले के ठानेका छन् भन्ने कुरा सोच्ने कि नसोच्ने सरकार पक्षले ?’

तुम्बाहाम्फेले बलात्कारका आरोपीलाई साधारण तारिखमा छोड्ने न्यायाधीशको कार्यकुशलतामाथि प्रश्न खडा भन्दै यस विषयमा छानबिन हुनुपर्ने बताइन् ।