हामी सबैकाे संसारन्यूज

काठमाडौं । रिलायबल नेपाल लाइफ इन्स्योरेन्स कम्पनीको नाफा अघिल्लो आर्थिक वर्षको तुलनामा २१.६५ प्रतिशतले बढेको छ । गत आर्थिक वर्षको अन्त्यसम्म कम्पनीले २७ करोड ४८ लाख रुपैयाँ खुद नाफा कमाएको हो । जुन पोहोर असार मसान्तसम्म २२ करोड ५९ रुपैयाँमा सीमित थियो । यो २१.६५ प्रतिशतको वृद्धि हो ।

सोहि अवधिमा कम्पनीको खुद बीमा शुल्क आर्जन पनि २७.४२ प्रतिशत बढेको छ । गत आर्थिक वर्षको अन्त्यसम्म इन्स्योरेन्सले ३ अर्ब ७७ करोड रुपैयाँ खुद बीमा शुल्क आर्जन गरेको हो । सो अवधिमा कम्पनीले कुल ३ अर्ब ९७ करोड रुपैयाँ बीमा शुल्क आर्जन गरेको हो । कम्पनिले गत आर्थिक वर्षमा कुल बीमा शुल्क आर्जन ३१.८५ प्रतिशलते बढाउन सफल भएको छ ।

कम्पनीको बीमा शुल्क सँगै दाबी भुक्तानी पनि बढिरहेको छ । यसै क्रममा कम्पनीले गत आर्थिक वर्षमा ७१ करोड ७७ लाख रुपैयाँ दाबी भुक्तानी गरेको छ । हालसम्मको तथ्यांक अनुसार कम्पनीले कुल १० हजार ३८ वटा दाबीबापत एक अर्ब १७ करोड रुपैयाँ भुक्तानी गरेको देखिन्छ ।

गत आर्थिक वर्ष कम्पनीको भुक्तानी हुन बाँकी दाबी शून्य छ। व्यवसायिक वृद्धिसँगै कम्पनीको अभिकर्ता कमिसन पनि ३४ प्रतिशतले बढेको छ । कम्पनीले गत आर्थिक वर्षको अन्त्यसम्म ५७ करोड ६९ लाख रुपैयाँ अभिकर्ता कमिसनबापत खर्च गरेको छ । नाफासँगै खर्चका आकार पनि बढेका छन् । कर्मचारीका लागि व्यवस्था गरिएको रकम ४९ लाख रुपैयाँ बढेर २ करोड ७४ लाख रुपैयाँ पुगेको छ ।

यस अवधिमा कम्पनीको जीवनबीमा कोष ५९.४८ प्रतिशतले वृद्धि भएको छ । कोषमा ४ अर्ब ६० करोड रुपैयाँ सञ्चित छ । चुक्ता पुँजी १ अर्ब ४० करोड रुपैयाँ रहेको कम्पनीको जगेडा कोषमा एक अर्ब ९ करोड रुपैयाँ जम्मा भएको छ । गत आर्थिक वर्षको अन्त्यसम्म कम्पनीले महाविपत्ति जगेडामा १० करोड ७३ लाख रुपैयाँ जम्मा गरेको देखिन्छ ।