हामी सबैकाे संसारन्यूज

काठमाडौं। मञ्जुश्री फाइनान्स लिमिटेडले ‘मञ्जुश्री तलब बचत खाता’ सञ्चालन गरिरहेका ग्राहकका लागि जरुरी सूचना जारी गर्दै विगत ६ महिनादेखि नियमित रूपमा तलब रकम जम्मा नभएका खातामा उपलब्ध बीमा सुविधा निष्क्रिय हुने जनाएको छ।

फाइनान्सले जारी गरेको सूचनाअनुसार ग्राहकले आफू कार्यरत संस्था वा कार्यालयबाट प्राप्त हुने मासिक वा त्रैमासिक तलब रकम नियमित रूपमा सम्बन्धित तलब बचत खातामा जम्मा नगरेमा खाताले पाउँदै आएको बीमा सुविधा कायम नरहने जनाइएको छ।

त्यस्तै, खातासम्बन्धी सर्त तथा नियमहरू पालना नगरेका कारण २०८३ साल भदौ २२ गतेदेखि यस्ता खातामा उपलब्ध तलब बचत खाताअन्तर्गतका सम्पूर्ण सेवा–सुविधा हटाइने र ती खातालाई साधारण बचत खातामा परिणत गरिने फाइनान्सले जनाएको छ।

फाइनान्सले आफ्ना ग्राहकलाई समयमै खाताको अवस्था अद्यावधिक गर्न तथा आवश्यक सर्तहरू पूरा गरी सेवा–सुविधा निरन्तर कायम राख्न आग्रह गरेको छ।

थप जानकारीका लागि ग्राहकले नजिकको मञ्जुश्री फाइनान्स शाखा कार्यालय, टोल–फ्री नम्बर १८१०३५०००१३२ वा customercare@manjushreefinance.com.np इमेलमार्फत सम्पर्क गर्न सक्ने फाइनान्सले जनाएको छ।