हामी सबैकाे संसारन्यूज

रौतहट । रौतहटको देवाही गोनाही नगरपालिका–१, करुनियास्थित लालबकैया खोलामा नुहाउने तथा पौडी खेल्ने क्रममा डुबेर दुई बालबालिकाको मृत्यु भएको छ भने एक बालिका अझै बेपत्ता छन्।

प्रहरीका अनुसार २०८३ साउन २६ गते करुनिया बस्ने करमे आलमका करिब १० वर्षीय छोरा महमद रमतुलाह, हिसी अकतरकी करिब १० वर्षीया छोरी सबनम खातुन र शेख खुर्सैदकी करिब १० वर्षीया छोरी रौशन खातुन लालबकैया खोलामा नुहाउने तथा पौडी खेल्ने क्रममा पानीमा डुबेर बेपत्ता भएका थिए।

घटनाको जानकारी प्राप्त हुनासाथ इलाका प्रहरी कार्यालय देवाही गोनाहीबाट प्रहरी निरीक्षक तेजप्रसाद भट्टराईको कमाण्डमा ७ जना प्रहरी खोजी तथा उद्धारमा परिचालन भएका थिए। त्यस्तै, सशस्त्र प्रहरी बल बेस देवाही गोनाहीबाट सशस्त्र प्रहरी सहायक निरीक्षक भक्तबहादुर शाहीको कमाण्डमा ५ जना तथा सशस्त्र प्रहरी बल नेपाल नं। ११ गण हेडक्वार्टर रौतहटबाट सशस्त्र प्रहरी सहायक निरीक्षक भीमबहादुर पुनको कमाण्डमा रबर बोर्डसहितको टोली खोजीमा खटिएको थियो।

खोजी गर्ने क्रममा साउन २७ गते बिहान करिब ७ः३० बजे महमद रमतुलाहको शव घटनास्थलबाट करिब ५ किलोमिटर दक्षिण परोहा नगरपालिका–२, जिंगडवास स्थित लालबकैया खोला किनारमा फेला परेको प्रहरीले जनाएको छ।

त्यसैगरी, सोही समयमा सबनम खातुनको शव पनि जिंगडवा क्षेत्रमा खोला किनारमा फेला परेको थियो। दुवै शव एक–अर्काबाट करिब २०० मिटरको दूरीमा फेला परेका हुन्।

घटनामा बेपत्ता भएकी रौशन खातुनको भने खोजी कार्य जारी रहेको प्रहरीले जनाएको छ।