Sansar News
काठमाडौं । काठमाडौं महानगरपालिकाका मेयर बालेन शाहले अनधिकृत संरचना बनाएर भाडामा लगाउने मालिकहरुबाट भाडावाललाई क्षतिपूर्ति दिलाउन सहयोग गर्ने बताएका छन् ।
मेयर शाहले अनधिकृत संरचनाहरुका भाडावालहरुलाई पर्न गएको असुविधाप्रति दःुख व्यक्त गर्दै भाडावाललाई आर्थिक क्षति पुर्याएवापत् हुनसक्ने कानुनी कारबाही खोजी गरेर अनधिकृत संरचनाका मालिकहरुबाट क्षतिपूर्तिका लागि सहयोग गर्ने विश्वास दिलाएका छन् ।
मेयर शाहले अनधिकृत संरचना भत्काउने आफुहरुको तत्कालको निर्णय नभएर ३५ दिने सूचना जारी गरेको र उक्त अवधिमा कोही पनि महानगरमा छलफल तथा सरसल्लाह गर्न नआएकोमा आफुहरुसँग तितो अनुभव रहेको बताएका छन् ।
‘अनधिकृत संरचनाहरुप्रतिको महानगरको अनुगमन लगायतका गतिबिधि सँधै रहनेछन् । यसैले हामी अनुरोध गर्दछौँ कि अनधिकृत संरचनाहरु नबनाइयोस्, बनाएका अनधिकृत संरचनाहरु आफैले भत्काउनुहोस् । यसका साथै त्यस्ता संरचनाहरु भाडामा लगाउने नगरियोस् ।’ मेयर शाहले भनेका छन् ।
काठमाण्डौं महानगरपालिकाले बानेश्वर, न्युरोड, दरबारमार्ग, कोटेश्वर लगायतका क्षेत्रमा अनधिकृत संरचना बनाएर व्यवसायिक प्रयोजनमा ल्याइएको पाइएपछि त्यस्ता संरचना भत्काएको छ ।
वि.सं.२०७९ भदौ ८ बुधवार २०:२२ मा प्रकाशित
