हामी सबैकाे संसारन्यूज

काठमाडौं । नागरिक उन्मुक्ति पार्टीकी अध्यक्ष रन्जिता श्रेष्ठ चौधरीले कैलाली क्षेत्र नं १ बाट निर्वाचन लड्ने घोषणा गरेकी छन् ।

२०७४ को प्रतिनिधिसभा सदस्यमा निर्वाचित रेशम चौधरीकी पत्नी रहेकी रन्जनाले आगामी मंसिर ४ गते हुने प्रतिनिधिसभा निर्वाचनका लागि कैलाली क्षेत्र नं १ बाट आफ्नो उम्मेदवारी घोषणा गरेकी हुन् ।

बुधबार आयोजित पार्टीको सार्वजनिक कार्यक्रममा अध्यक्ष चौधरीले भनिन्–आगामी मंसिर ४ गते हुने प्रतिनिधिसभाको निर्वाचनमा कैलालीको ५ क्षेत्र मध्ये १ नम्बरबाट नागरिक उन्मुक्ति पार्टीको तर्फबाट म आफ्नो उम्मेदवारी घोषणा गर्छु ।’

टिकापुर घटनाको अभियोगमा हाल रेशम चौधरी जेलमै रहेका कारण उनले चुनाव लड्ने सम्भव नभएपछि पत्नी रन्जनाले उम्मेदवारी घोषणा गरेकी हुन् ।

सो पार्टीले गत बैशाखमा सम्पन्न स्थानीय तहको निर्वाचनमा कैलालीको टिकापुर नगरपालिका, भजनी नगरपालिका तथा जानकी र जोशीपुर गाउँपालिकामा निर्वाचन जितेको थियो ।