Sansar News
काठमाडौं । सिद्धार्थ बैंकको बैंकिङ्ग सेवा तथा कारोबार ३ दिन प्रभावित हुने भएको छ । बैंकले हाल प्रयोग गरी रहेको प्राथमिक बैंकिङ्ग प्रणालीलाई परिवर्तन गरी थप सुविधा सहितका फिनाकल कोर बैंकिङ्ग प्रणाली प्रयोगमा ल्याउने क्रममा ३ दिनको लागि बैंकिङ्ग सेवाहरु पूर्ण रुपमा बन्द रहने जनाएको हो ।
बैंकका अनुसार यहि भदौ १७ गते शुक्रबार सन्ध्या कालिन काउन्टरहरु,१८ गते शनिबार बिदा काउन्टरहरु, र १९ गते आइतबार सम्पूर्ण बैंकिङ्ग कारोबारहरु बन्द रहने छन् ।
त्यस्तै, १७ गते शुक्रबार बेलुका ६ बजे पश्चात् इन्टरनेट बैंकिङ्ग, मोबाइल बैंकिङ्ग, एटीएम, कार्ड (क्रेडिट/प्रीपेड कार्ड बाहेक), रेमिट्यान्स लगायत अन्य सम्पूर्ण बैंकिङ्ग कारोबारहरु बन्द हुने बैंकले जनाएको छ ।
बैंकका अनुसार कोर बैंकिङ्ग प्रणाली परिवर्तन पश्चात् ग्राहकहरुले हाल कायम रहेको खाता नम्बरबाटै साविक बमोजिम कारोबार गर्न सक्ने छन् । उक्त दिनहरुमा गर्नुपर्ने अत्यावश्यक बैंकिङ्ग कारोबार उल्लेखित मिति अगावै गरी सहयोग गरिदिन समेत बैंकले आग्रह गरेको छ ।
थप जानकारीका लागि बैंकको नजिकैको शाखा कार्यालय वा बैंकद्वारा सञ्चालित ग्राहक सेवा केन्द्रको फोन नम्बर ०१-५९७००२० वा इमेल customercare@sbl.com.np मा सम्पर्क गर्न बैंकले अनुरोध गरेको छ ।
यस्तो छ सूचना :
वि.सं.२०७९ भदौ १६ बिहीवार ११:१९ मा प्रकाशित
