हामी सबैकाे संसारन्यूज

काठमाडौं । नेपाली कांग्रेसका सभापति शेरबहादुर देउवाले कुनै हालतमा पनि गठबन्धन नटुट्ने बताएका छन् ।

कांग्रेस चितवन जिल्ला समितिले १०९ औं विपी जयन्तीको अवसरमा आयोजना गरेको कार्यक्रमलाई सम्बोधन गर्न चितवन पुगेका सभापति देउवाले गठबन्धन कांग्रेसको हितमा रहेकोले गठबन्धनको विरोध गर्नु भनेको पार्टी सिध्याउने षड्यन्त्र रहेको बताएका हुन् ।

‘गठबन्धनको विरुद्धमा ठूलो षड्यन्त्र भइरहेको छ, तर गठबन्धन कुनै हालतमा टुट्दैन,’ देउवाले भने, ‘गठबन्धनको विरोध गर्नु भनेको पार्टी सिध्याउने षड्यन्त्र हो ।’

पार्टीलाई फाइदा हुने गरेरै सिट बाँडफाँट हुने भन्दै कार्यकर्तालाई आश्वस्त पारेका देउवाले पार्टीलाई एक बनाउन सबै लाग्नुपर्ने समेत बताए ।

देउवाले एमसीसीका विषयमा कुरा गर्दै भने–‘एमसिसी पास भयो भने अमेरिकी सेना नेपाल आउँछ भन्थे, खोइ त अमेरिकी सेना आएको ?’

सभापतिसँगै चितवन पुगेका गृहमन्त्री बालकृष्ण खाँडले गठबन्धनबीच तालमेल गरेर निर्वाचनमा जाँदा पार्टीभित्रका केही साथीलाई मर्का पर्ने अवस्था आएपनि त्यसलाई स्वीकारेर जानुपर्ने बताएका छन् ।