हामी सबैकाे संसारन्यूज

काठमाडौं । नागरिकता विधेयक प्रमाणीकरण नगर्ने राष्ट्रपति विद्यादेवी भण्डारीको कदमप्रति उपराष्ट्रपति नन्दबहादुर पुनले विरोध जनाएका छन् । उनले संविधानको दायराभन्दा बाहिर जाने छुट कसैलाई नभएको टिप्पणी गरेका छन् ।

“संविधानको पालना गर्नु प्रत्येक व्यक्तिको कर्तव्य हो । संविधानबमोजिम सबैबाट आ-आफ्नो कर्तव्य पालना गर्नुका साथै संविधानको पालना र संरक्षण हुनुपर्दछ”, बुधबार विज्ञप्ति जारी गर्दै उपराष्ट्रपति पुनले भनेका छन्, “पछिल्ला दिनमा विकसित घटनाक्रमले संविधानको प्रमुख पालक र संरक्षकबाट नै सचेततापूर्वक संविधानको पालन र संरक्षण हुन नसकेको भनी वृहत् जनआवाज उठिरहेको छ । यो आवाज उठ्ने परिस्थितिको सिर्जना हुनु ज्यादै दुःखद पक्ष हो ।”

उपराष्ट्रपति पुनले संविधान दिवसका दिन गरेको प्रतिबद्धतालाई स्मरण गर्न आग्रह गरेका छन् । “हामीले भर्खर संविधान दिवस मनायौँ । संविधान दिवसमा गरेको प्रतिबद्धतालाई स्मरण गर्दै संविधानको पालन र संरक्षणका लागि म सबै पक्षमा आग्रह गर्दछु”, उनले राष्ट्रपति भण्डारीप्रति लक्षित गर्दै भनेका छन् ।

संसदको दुवै सदनबाट पारित भई प्रमाणीकरणका लागि पुगेको नागरिकता विधेयक राष्ट्रपति भण्डारीले मंगलबार बेलुकी प्रमाणीकरण गर्न अस्वीकार गरेकी थिइन्। संविधानको प्रावधानअनुसार नागरिकता विधेयक प्रमाणीकरण गर्नुपर्ने भए पनि प्रमाणीकरण नगरेपछि उनी आलोचनाको घेरामा छिन् ।

सत्ता गठबन्धनले विज्ञप्ती नै निकालेर विरोध जनाएको छ । गठबन्धनले राष्ट्रपतिको कदमलाई लिएर सर्वोच्च रिट नै दायर गर्नेसम्मको तयारी गरेको छ ।