काठमाडौं । नेकपा (माओवादी केन्द्र)को धनकुटा जिल्ला कमिटीमा विद्रोह भएको छ । माओवादी केन्द्रको धनकुटाका सबै पदाधिकारीसहित जिल्ला कमिटीका सदस्यहरुले सामूहिक राजीनामा दिएका छन् । साथै, धनकुटाबाट प्रतिनिधित्व गर्ने सबै केन्द्रीय नेताहरुले पनि पार्टीबाट अलग भएको घोषणा गरेका छन् ।
माओवादी केन्द्र धनकुटाका जिल्ला संयोजक डिल्लीराम राईले आइतबार एक विज्ञप्ति जारी गर्दै जिल्लाबाट प्रतिनिधित्व गर्ने पोलिट्ब्यूरो सदस्य, केन्द्रीय सदस्य, प्रदेश समितिका पदाधिकारी, प्रदेश सदस्य र जिल्ला समन्वय समितिका सदस्यहरुले सामूहिक राजीनामा दिएको घोषणा गरेका हुन् ।
पोलिट्व्यूरो सदस्य हेमराज भण्डारीसँगै केन्द्रीय सदस्य धनमाया विक र प्रदेश सहसचिव ऋषिराम ढुंगानालगायत १४ जना प्रदेश सदस्य र जिल्ला समन्वय समितिका पदाधिकारी र सदस्यहरुले राजीनामा दिएका छन् ।
सामूहिक राजीनामा पछि माओवादी छाडेको समूहले प्रतिनिधिसभा सदस्यमा स्वतन्त्र उम्मेदवारी दिने पनि घोषणा गरेको छ । समूहले पोलिटब्यूरोबाट बाहिरिएका हेमराज भण्डारीलाई प्रतिनिधिसभातर्फ उम्मेदवार बनाउने निर्णय गरेको छ ।
कांग्रेसलाई सघाउने निर्णयपछि विद्रोह
सत्तारुढ गठबन्धनभित्र सिट बाँडफाँट गर्दा धनकुटाबाट प्रतिनिधिसभा सदस्यको लागि कांग्रेसको तर्फबाट उम्मेदवारी दिने सहमति भएपछि माओवादीभित्र विद्रोह भएको हो । गठबन्धनभित्र राप्रपा पृष्ठभूमिका नेता सुनिलबहादुर थापालाई प्रतिनिधिसभा तर्फको उम्मेदवार बनाउने निर्णय भएको थियो ।
एक वर्षअघि मात्रै कांग्रेस प्रवेश गरेका थापालाई उम्मेदवार बनाउन नहुने मत कांग्रेसभित्रै देखिएका बेला माओवादीभित्र विद्रोह भएको थियो । माओवादी केन्द्रभित्र यसअघिदेखि नै धनकुटा नछाड्न दबाब थियो । तर, आन्तरिक विषयलाई वेवास्ता गर्दै कांग्रेसलाई सघाउने निर्णय भएपछि विद्रोह भएको हो ।
यस्तो छ सामूहिक राजीनामाको पत्र
वि.सं.२०७९ असोज ९ आइतवार १६:०६ मा प्रकाशित
