हामी सबैकाे संसारन्यूज

काठमाडौं । सत्तारुढ गठबन्धन छाडेर एमालेसँग चुनावी तालमेल गरेको जनता समाजवादी पार्टी (जसपा)लाई एमालेले धोका दिएको छ । एमालेले तालमेलको सहमतिअनुसार जसपालाई छुट्याएको ठाउँमा पनि आफ्ना उम्मेदवार उठाएको छ ।

एमालेले जसपाको भागमा परेको मोरङको २ वटा प्रदेशसभामा उम्मेदवारी दिने भएको छ । एमालेले मोरङको निर्वाचन क्षेत्र नं. ५ तथा प्रदेशसभाको ४(२), ५(२) र ६(२) जसपालाई दिने सहमति गरेको थियो । तर, एमालेले जसपालाई दिने सहमति गरेका सबै क्षेत्रमा आफ्ना उम्मेदवार उठाएको छ ।

मोरङको ४(२) मा एमालेले जीवन घिमिरेलाई उठाएको छ भने ६(२) मा पर्शुराम बस्नेतलाई उठाएको छ । प्रतिनिधिसभा अन्तर्गतको क्षेत्र नं. ५ मा पनि एमालेको तर्फबाट स्वतन्त्र उम्मेदवारी पर्न सक्ने सम्भावना छ । एमालेका केही नेताले स्वतन्त्र उम्मेदवारी दिने तयारी गरेको बुझिएको छ ।