Sansar News
१८ चैत, रोल्पा । समयमै स्वस्थ्य संस्था नजाँदा आज पश्चिम रोल्पाकी एक सुत्केरीको मृत्यु भएको छ ।
मृत्यु हुनेमा दुईखोली गाउँपालिका–७ कुरेलीका २० वर्षीया बिमला रोका रहेको जिल्ला अस्पताल रोल्पाले जनाएको छ ।
सुत्केरी व्यथा लागेको तीन÷चार दिनसम्म गाउँमा धामी झाँक्रीले झारफुक गर्दा सञ्चो नभएपछि बिमलालाई अस्पताल ल्याइएको थियो । उपचारका लागि अस्पताल ल्याउँदा आमा वेहोस तथा पेटमा भएको शिशुको ज्यान गइसकेको जिल्ला अस्पतालका सिनियर अहेव कुलबहादुर डाँगीले बताउनुभयो ।
गर्भावस्थामा हुने ‘इक्लाम्प्सिया’ को कारणले आमाको मृत्यु भएको अहेव डाँगीले जानकारी दिनुभयो । “समयमै बिरामीलाई स्वास्थ्य संस्थामा पु¥याएको भए बचाउन सकिन्थ्यो”– उहाँले भन्नुभयो ।
जिल्लाका सबै स्वास्थ्य केन्द्रमा ‘बर्थिङ सेन्टर’को सुविधा रहेको तथा जिल्ला अस्पतालमा समेत शल्यक्रिया सेवा उपलव्ध भए पनि चालू आवमा दुई गर्भवतीको ज्यान गएको जिल्ला अस्पतालले जनाएको छ ।
वि.सं.२०७३ चैत १८ शुक्रवार ०२:४१ मा प्रकाशित
