हामी सबैकाे संसारन्यूज

काठमाडौं । निर्वाचन आयोगले कुनै एक दलको अध्यक्ष अर्को दलको समानुपातिक सांसद बन्न नमिल्ने भन्ने कानुनी व्यवस्था नरहेको बताएका छन् ।

निर्वाचन आयोगमा मंसीर ४ मा सम्पन्न निर्वाचनको अन्तिम नतिजा घोषणा गर्न आयोजित पत्रकार सम्मेलनमा प्रमुख आयुक्त दिनेशकुमार थपलियाले समानुपातिक सांसद बन्न नसक्ने विषयमा स्पष्ट कानुनी व्यवस्था नरहेको तर नैतिकताको विषय हुनसक्ने बताए ।

थपलियाले मंसीर ४ मा सम्पन्न निर्वाचनका बेला देखिएको विभिन्न समस्यालाई लिएर ८ वटा निर्वाचन कानुनलाई एउटै कानुन बनाउने गरी संशोधन गर्न लागिएको बताए ।

त्यसैगरी मत बदरका विषयमा राखिएको प्रश्नमा आयोगले जिल्ला निर्वाचन कार्यालयका निर्वाचन अधिकृतहरूसँग यसबारेमा विवरण मागेको उल्लेख गरे । थपलियाले पुस ३ गते समानुपातिक सांसदहरूलाई प्रमाणपत्र वितरण गर्ने जानकारी समेत दिएका छन् ।

आयोगको यो जानकारी सँग नेपाल परिवार दलका अध्यक्ष एकनाथ ढकाललाई नेकपा एमालेका तर्फबाट समानुपातिक सांसद बन्नका लागि बाटो खुला भएको छ ।