हामी सबैकाे संसारन्यूज

काठमाडौं । माओवादी केन्द्र नेतृत्वको सरकार निर्माणमा सहयोगी बनेका राष्ट्रिय प्रजातन्त्र पार्टी र नागरिक उन्मुक्ति पार्टी सरकारमा भने सहभागि नहुने भएका छन् । दुवै पार्टीले तत्काल सरकारमा नजाने निर्णय गरेका हुन् ।

राप्रपाले आन्तरिक छलफल नटुंग्याएको कारण सरकारमा जाने वा नजाने निर्णय लिएको छैन । सोमबार सत्ता गठबन्धनको बैठकमा सहभागि हुन गएका राप्रपा अध्यक्ष राजेन्द्र लिङ्देनले सरकारमा सहभागि नहुने बताएका थिए । उनले सरकारलाई भने समर्थन गर्ने बताएका थिए ।

यता, नागरिक उन्मुक्ति पार्टीले रेशम चौधरीलगायत बन्दी रिहाइको मागलाई उठाउँदै तत्काल सरकारमा नजाने निर्णय गरेको छ । पार्टी संरक्षक रेशम चौधरीसँगको छलफल पछि पार्टीका नेताहरुले यस्तो निर्णय लिएका हुन् ।

सरकार निर्माणमा समर्थन जनाएको जनता समाजवादी पार्टी (जसपा)ले पनि सरकारमा जाने वा नजाने भन्ने विषयमा निर्णय लिएको छैन । मंगलबारसम्म संसदीय दलको नेता चयन गर्ने र उक्त निर्णय पछि मात्रै सरकारमा जाने वा नजाने निर्णय हुने जसपाका एक नेताले बताए ।

हाल माओवादी केन्द्र नेतृत्वको सरकार निर्माणमा भूमिका खेलेका एमाले, राष्ट्रिय स्वतन्त्र पार्टी, जनमत पार्टी र केही स्वतन्त्र सांसद सरकारमा सहभागि हुने तयारीमा छन् । संसद भवनमा जारी बैठकले उक्त विषयमा निर्णय लिनेछ ।