Sansar News
काठमाडौं । प्रधानमन्त्री पुष्पकमल दाहाल ‘प्रचण्ड’ ले मन्त्रालय फुटाएर दलबीच भागबन्डा मिलाउने भन्ने हल्ला गलत रहेको बताएका छन् ।
बुधबार अपरान्ह प्रधानमन्त्री निवास बालुवाटारमा भएको सत्तासाझेदार दलका शिर्षनेताहरुको बैठकमा प्रधानमन्त्री प्रचण्डले भागबन्डा मिलाउन मन्त्रालय फुटाउने भनेर आएका हल्ला गलत भएको बताएका हुन् ।
छलफलमा राष्ट्रिय प्रजातन्त्र पार्टी (राप्रप)का अध्यक्ष तथा सांसद राजेन्द्र लिङ्देनले मन्त्रालय फुटाएर भागबन्डा मिलाउँदा जनतामा गलत सन्देश जाने भन्दै राखेको सुझावमा प्रधानमन्त्री प्रचण्डले भने, ‘धेरैको चित्त बुझाउनुपर्ने बाध्यता त छ नै, तर त्यसका लागि गलत थिति बसाल्न हुँदैन भन्नेमा म छु । हल्लाहरु सुनेर नपत्याइदिनुहोला ।’
संबैधानिक व्यवस्था अनुसार संघीय सरकारमा बढीमा २५ जना मन्त्री बनाउन पाइन्छ । तर सत्ता साझेदार दलहरुले बढी मन्त्रालयको दाबी गरिरहेका बेला प्रधानमन्त्री प्रचण्ड सबैको चित्त बुझाउनुपर्ने दबाबमा रहेका छन् ।
नेकपा एमालेसहित ७ दलको समर्थनमा पुस १० गते प्रधानमन्त्रीमा नियुक्त भएका प्रचण्डले तत्कालै माओवादी केन्द्रबाट २, नेकपा एमाले ४ र राष्ट्रिय स्वतन्त्र पार्टी र जनमतका १÷१ गरी ८ सदस्यीय मन्त्रिमण्डल गठन गरेका थिए । अब बाँकी १७ वटा मन्त्रालयमा प्रधानमन्त्रीले पुस २६ गते विस्वासको मत लिएपछि जिम्मेवारी बाँडफाँट गर्ने तयारीमा रहेका छन् ।
त्यसैगरी प्रचण्डलाई प्रधानमन्त्रीमा समर्थन गरेको राप्रपाले आफ्ना तीन शर्त पूरा भएमा मात्र सरकारमा सहभागी हुने बताउँदै आएको छ भने उपे्रन्द्र यादव नेतृत्वको जसपाले सरकारमा जाने/नजाने भन्ने निर्णयमा पुग्न सकेको छैन । यद्यपी उक्त दलले संसदीय दलको नेतामा रामसहाय यादवलाई सर्वसम्मत चयन गरेको छ ।
यता नेकपा एकिकृत समाजवादीको चार दिनसम्म बसेको स्थायी समिति र पोलिटव्युरो बैठकले समेत सरकारमा जाने÷नजाने विषयमा टुंगो लगाउन सकिरहेको छैन । यसैबीच आजै प्रधानमन्त्री प्रचण्डलाई भेट्न सिंहदरबार पुगेका अध्यक्ष माधव नेपालसँग प्रधानमन्त्री प्रचण्डले विस्वाको मत मागेका थिए ।
वि.सं.२०७९ पुस २० बुधवार १९:५० मा प्रकाशित
