हामी सबैकाे संसारन्यूज

काठमाडाैं । क्रिकेटर सन्दीप लामिछाने थुनामुक्त भएका छन् । उच्च अदालत पाटनकाे आदेशअनुसार २० लाख रुपैयाँ धरौटी बुझाएर उनी थुनामुक्त भएका हुन् । लामिछाने गत असोज २१ गते त्रिभुवन विमानस्थलबाटै पक्राउ परेका थिए ।

बालिग बलात्कार मुद्दामा काठमाडौं जिल्ला अदालतले कात्तिक १८ मा मुद्दाको अन्तिम टुंगो नलागुन्जेलसम्म थुनामा राख्न दिएको आदेशविरुद्ध लामिछानेले उच्च अदालत पाटनमा निवदेन दिएका थिए । त्यसैमा सुनुवाइ गर्दै उच्च अदालतले उनलाई धरौटीमा छाड्ने आदेश गरेको हो।

थुनामुक्त गरेपनि लामिछानेलाई अदालतले सर्तहरू भने राखेकाे छ । पाटन उच्च अदालतका न्यायाधीशहरू ध्रुवराज नन्द र रमेश ढकालको इजलासले बिहिबार मुद्दाको अन्तिम टुंगो नलागेसम्म लामिछानेलाई विदेश जान रोकसहितका सर्तहरु भने राखेको छ ।

त्यसैगरी, पीडित र मुद्दाबारे कुनै सामग्री प्रकाशन गर्न वा विद्युतीय, सार्वजनिक सञ्चारमाध्यम, सामाजिक सञ्जालमा कुनै टिकाटिप्पणी गर्न पनि उनलाई निषेध गरेको छ ।