हामी सबैकाे संसारन्यूज

काठमाडौं । नागरिक उन्मुक्ति पार्टीकी अध्यक्ष रन्जिता श्रेष्ठले आफुहरु सबैले सधै प्रयोग गर्न मिल्ने साधन नभएको बताएकी छन् ।

नागरिक उन्मुक्तिले विश्वासको मत नदिएपछि सुदूरपश्चिम सरकार ढलेसँगै अध्यक्ष श्रेष्ठले यस्तो बताएकी हुन् ।

‘हामी विचारमा कटिबद्ध छौँ, सबैले सधैं प्रयोग गर्ने साधन होइनौं । यो देश हाम्रो पनि हो, देशको शासन प्रशासनमा हाम्रो पनि सहभागिता रहनुपर्दछ । भौगोलिक सांस्कृतिक पहिचान नेपालीको पनि सम्मान हो, मुलवासीको अपमान गरेर मुलुक कहिल्यै समृद्दशाली हुनसक्दैन त्यसैले जनभावनाको कदर गरौँ । जनमतको कदर गरौ ।’ अध्यक्ष श्रेष्ठले भनेका छन् ।

अहिलेसम्म राज्य टीकापुर घटनाप्रति अनुदार रहेको, मानवअधिकारकर्मीहरुको आँखा नखुलेको र आफुहरुलाई उचाल्नेहरुको ताँती पनि लामै रहेको आरोप श्रेष्ठले लगाएकी छन् ।

‘तर हामी न्यायको पालना गरेर जेलमा चौखुरिएर बस्न बाध्य छौं । सम्मानित राष्ट्रप्रति हिजो, आज र भोलि पनि उत्तिकै बफादार थारुलाई न्यायिक दृष्टिको प्रकाश किन परिरहेको छैन ? झ्यालखानाको बुइँगलबाट न्यायको घाम झुल्किन्छ कि भनेर हामी सधैं नियालिरहन्छौं । न्यायको पारिलो घाम आँखाले देख्दादेख्दै पनि शासकले छानो हालेर जबरजस्ती छायाँ बनाइरहेको पनि प्रष्टै देखिन्छ । जय नागरीक ।’ अध्यक्ष श्रेष्ठले भनेकी छन् ।