हामी सबैकाे संसारन्यूज

काठमाडौं । सहकारीमा बचत गर्दा सीमा तोक्ने तयारीप्रति राष्ट्रिय सहकारी महासंघले विरोध जनाएको छ । सहकारी ऐन संशोधन गरी सहकारीमा २५ लाखभन्दा बढी बचत गर्न नपाइने व्यवस्था गर्न लागिएकोमा महासंघले विरोध जनाएको हो । बिहीबार पत्रकार सम्मेलन गर्दै महासंघले बचतमा सीमा निर्धारण गर्दा सहकारी अभियानलाई धक्का पुग्ने बतायो ।

सरकारले सम्पत्ति शुद्धीकरण (मनी लाउण्डरिङ)लाई ध्यानमा दिँदै बचतमा सीमा तोक्ने व्यवस्था गर्न लागेको छ । सहकारी ऐन, २०७४ को दफा ५२ को संशोधन प्रस्तावमा व्यक्तिगत बचतको सीमा तोक्ने कुरा उल्लेख छ । यसबाट सहकारी अभियानलाई सङ्कुचित बनाउन खोजिएकाले उक्त प्रस्तावित दफालाई हटाउनु पर्ने महासंघको सुझाव छ ।

सहकारीमा वर्तमान अवस्थामा चुनौतीको रुपमा देखिएको तरलताको व्यवस्थाको लागि महासंघको निर्देशनमा बचत तथा ऋण सहकारी संघ (नेफ्स्कून) र राष्ट्रिय सहकारी बैंकले स्थापना गरेको तरलता व्यवस्थापन कोषमा राज्यको तर्फबाट १० अर्व रुपैयाँ थप गर्न माग गरिएको छ । महासंघले सन्दर्भ ब्याजदर पुनरावलोकन गर्न, सहकारी नियामावली संसोधन गरी ब्याजदर स्वचालित हुने व्यवस्था मिलाउन,सहकारीको ऋण पूर्नसंरचना र पूर्नतालिकीकरणको व्यवस्था गर्न, अनुगमनका लागि सेकेन्ड टायर इन्सटिच्युस स्थापना गर्न तथा ऋण असुलीमा सहयोग गर्नलगायतका आग्रह समेत गरेको छ ।

सहकारीहरूमा पनि तरलता अभाव खेपिरहेको अवस्थामा सरकारले अभिभावकत्व लिन र सकारात्मक सन्देश प्रवाह गर्न महासंघको आग्रह छ ।

याे पनि…

पत्रकार सम्मेलनमा महासंघका अध्यक्ष मिनराज कंडेलले अर्थतन्त्र संकुचित हुँदा सहकारी क्षेत्र पनि प्रभावित भएको बताएका छन् । सहकारी क्षेत्रमा परेको समस्या समाधानका लागि महासंघले सहजीकरण उपसमिति बनाएको,प्रधानमन्त्री, सभामुख, अर्थमन्त्री, भूमि व्यवस्था, सहकारी तथा गरिवी निवारण मन्त्री, कानून मन्त्री र संघिय सहकारी विभागका रजिष्ट्रारलाई समस्या समाधानका लागि तत्काल र दीर्घकालमा गर्नुपर्ने काम बारे सुझाव दिइएको बताए ।

यस्तै, महासंघले सहकारी संघ/संस्थाको ऋण असुलीमा सहयोगी भूमिका निर्वाह गर्दै सरकारले संघ संस्थाबाट ऋणीको नामको चल अचल सम्पत्ती रोक्काका लागि अनुरोध भइआएमा त्यसलाई सहज रुपमा ऋण सुरक्षण गर्ने वातावरण सरकारले सिर्जना गर्नुपर्ने महासंघको माग छ । सहकारी संस्थाले समेत सञ्चालक तथा व्यवस्थापनले लिएको ऋण असुलीलाई पहिलो प्राथमिकतामा राखी जोखिम न्युनीकरणका सम्पूर्ण उपायहरु अवलम्बन गर्नुपर्ने महांसघले बताएको छ ।

सहकारी संघरसंस्था सदस्यद्वारा संचालन र नियन्त्रण हुने भएकाले सदस्यले आफ्नो संस्थालाई समस्यामा पर्न नदिनका लागि जिम्मेवारपूर्ण भूमिका निर्वाह गर्नुपर्ने महासंघको भनाई छ । साथै, यस प्रतिकूल अवस्थालाई ध्यानमा राखी संघरसंस्था सुसञ्चालनमा केन्द्रित हुन महासंघले सम्पूर्ण सहकारी संघरसंस्थालाई समेत आव्हान गरेको छ।