काठमाडौं । राष्ट्रपति पदको लागि उम्मेदवारी मनोनयनको मिति नजिकिँदै जाँदा राजनीतिमा रोचक खेलहरु देखिन थालेका छन् । माओवादी केन्द्र पूर्वसहमतिबाट पछि हट्ने निर्णय गरेसँगै घटनाहरु आकंलन बाहिरबाट आउन थालेका हुन् । जसमा नेकपा (एमाले)का अध्यक्ष केपी शर्मा ओलीले एकीकृत समाजवादीका अध्यक्ष माधवकुमार नेपाललाई राष्ट्रपतिको उम्मेदवारको रुपमा अघि सार्ने सम्भावना देखिएको छ ।
एमाले उच्च स्रोतले बताएअनुसार वर्तमान गठबन्धन भत्काउने अवस्था देखिएसँगै नेपालको नाम अघि सार्ने तयारी गरिएको हो । माओवादी केन्द्रले नेपाली कांग्रेसलाई सघाउने बचन दिएको विषय बाहिरिएको बेला नेपालको नाम अघि आएको हो । तथापी एमालेले औपचारिकरुपमा भने नेपालको नाम अघि सारेको छैन ।
एमालेका एक पदाधिकारीले बताएअनुसार विभिन्न विकल्पमध्ये नेपालको नाम पनि रहेको छ । तत्कालै गठबन्धन भत्किने र अर्को राजनीतिक अस्थिरता आउने सम्भावनाका बीच एमालेले नेपालको नाम विकल्पमा राखेको उनले बताए ।
तत्कालिन नेपाल कम्युनिष्ट पार्टी (नेकपा)को विभाजनदेखि नै ओली र नेपालबीच निकै तिक्ततापूर्ण सम्बन्ध रहँदै आएको छ । पछिल्लो गठबन्धन निर्माणमा बेला पनि ओलीकै अनिइच्छाले एकीकृत समाजवादी सरकारमा समावेश हुन सकेको थिएन ।
एमाले उच्च स्रोतले बताएअनुसार हालै भएका गोप्य भेटवार्तापछि ओली र नेपालबीचको सम्बन्धमा सुधार आएको हो । जुन भेटवार्तापछि नै ओलीले नेपालको नाम विकल्पका रुपमा अघि सारेका हुन् ।
बताइएअनुसार ओलीले पार्टी एकता गर्नेगरी नै राष्ट्रपतिको प्रस्ताव राखेका छन् । नेपालको विषयमा ‘बाध्यकारी राष्ट्रिय सहमति’ हुने बुझाई ओलीको देखिन्छ । तर, नेपालको नाममा अन्य दलले कस्तो निर्णय गर्लान् त्यो भने हेर्न भने बाँकी नै छ ।
