हामी सबैकाे संसारन्यूज

काठमाडौं । राष्ट्रिय प्रजातन्त्र पार्टी (राप्रपा) ले कर्णाली प्रदेश सरकारलाई दिएको समर्थन फिर्ता लिएको छ ।

केन्द्रमा सत्ता समिकरणको फेरबदल भएसँगै राप्रपाले माओवादी केन्द्रका नेता राजकुमार शर्माको नेतृत्वमा रहेको कर्णाली प्रदेश सरकारलाई दिएको समर्थन फिर्ता लिएको हो ।

राप्रपाकी कर्णाली प्रदेश सभाकी सदस्य सन्तोषि साहीले मुख्यमन्त्रीलाई दिएको समर्थन फिर्ता लिएको जानकारी दिएकी छन् ।

‘मुलुककको पछिल्लो राजनीतिक घटनाक्रम, बारम्बार सत्ता समिकरणका गलत अभ्यासले जनतामा वितृष्णा पैदा हुन गएको छ । अहिलेको बिग्रदो आर्थिक अवस्थालाई सुधार गरी विकास र सुशासनमा केन्द्रीत हुनुको साटो झन् राजनीतिक अस्थिरता निम्त्याउने खेलमा सहभागी हुनु दुःखद कुरा हो ।’ पत्रमा भनिएको छ ।

शुभेच्छुकहरुको ठूलो असहमतिकाबीच आफुहरुले सरकारलाई समर्थन दिएर वा सरकारमा सहभागी भएर राष्ट्रियताको संरक्षण, विकास र सुशासनको पक्षमा मुलुकको प्रगति होस् भन्ने चाहेको तर सत्ता नेतृत्वकर्ता दलका साथै अन्य दलहरु आपसी सत्ता स्वार्थमा रुमल्लिँदा सत्तामा बसिरहन उपयुक्त नभएको बताइएको छ ।

‘राप्रपा यस्तो सत्ता स्वार्थमा सामेल नभई प्रतिपक्षबाटै मुलुक र जनताको हितको पक्षमा काम गर्ने संकल्प गर्दै पार्टीको केन्द्रीय निर्देशन अनुरुप प्रदेश सरकारलाई दिएको समर्थन फिर्ता लिएका छौं ।’ कर्णाली प्रदेश प्रमुख तिलक परियारसामु प्रदेश सरकारलाई दिएको समर्थन फिर्ताको पत्रमा भनिएको छ ।