हामी सबैकाे संसारन्यूज

काठमाडौं । नेकपा एमालेले उपराष्ट्रपतिका उम्मेदवार रामसहाय यादवविरुद्ध उजुरी दिएको छ ।

सत्ता साझेदार गठबन्धनबाट उपराष्ट्रपतिमा उम्मेदवार मनोनयन दर्ता गराएका जनता समाजवादी पार्टी (जसपा) का संसदीय दलका नेता यादवविरुद्ध एमालेले शनिबार निर्वाचन आयोगमा उजुरी दिएको हो ।

एमालेले यादवको उम्मेदवारी संविधान र कानुन विपरित रहेको भन्दै शनिबार नयाँ बानेश्वरस्थित अयोगको कार्यालयमा उजुरी दर्ता गराएको हो ।

संविधानमा राष्ट्रपति र उपराष्ट्रपति फरक लिङ्ग र समुदायको हुनुपर्ने रहेको र राष्ट्रपतिमा रामचन्द्र पौडेल निर्वाचित भइसकेको अवस्थामा उपराष्ट्रपतिको उम्मेदवार पुरुष हुन नसक्ने बताउँदै उसले उजुरी दिएको हो ।

सत्ता गठबन्धन दल जसपाकी नेतृ उपराष्ट्रपति पदका लागि महिला उम्मेदवार प्रमिला यादवले पनि उम्मेदवारी मनोनयन दर्ता गराएकी छन् भने गठबन्धनभित्रै रहेको जनमत पार्टीबाट पनि नेतृ ममता झाले उपराष्ट्रपति पदमा उम्मेदवार मनोनयन दर्ता गराएकी छन् ।

जनमतले उपराष्ट्रपति पदमा आफ्नो दावी गर्दै आएको छ । यद्यपी आज बस्ने सत्ता साझेदार दलको बैठकले उपराष्ट्रपति उम्मेदवारको टुंगो लगाउने बताइएको छ ।