काठमाडौं । डेभलपमेण्ट बैँकर्स एशोसिएसन नेपालको अध्यक्षमा सांग्रीला डेभलपमेण्ट बैंकका प्रमुख कार्यकारी अधिकृत सुयोग श्रेष्ठ निर्विरोध निर्वाचित भएका छन् ।
एशोसियसनको शुक्रबार चितवनमा सम्पन्न १७ औं वार्षिक साधारण सभाले कार्य समितिका सबै पदाधिकारीहरु सर्वसम्मत चयन गरेको हो ।
त्यस्तै उपाध्यक्षमा महालक्ष्मी बिकास बैंकका सिइओ बोधराज देवकोटा रहेका छन् भने सचिवमा सिन्धु बिकास बैंकका सिइओ राम कुमार गिरी र कोषाध्यक्षमा लुम्विनी विकास बैंकका सिइओ नरेश सिंह बोहरा निर्विरोध भएका छन् ।
त्यस्तै सदस्यहरुमा साइन रेसुंगा डेभलपमेण्ट बैंकका सिइओ प्रकाश पौडेल, ज्योति विकास बैंकका सिइओ श्रीचन्द्र भट्ट र एक्सल डेभलपमेण्ट बैंकका सिइओ डा. इन्द्र कट्टेल चयन भएका छन् ।
नवनियुक्त कार्य समितिका पदाधिकारीहरुको सपथ ग्रहण समेत सम्पन्न भइसकेको एसोसियसनले जनाएको छ ।
साधारण सभाले आ.व. २०७८/०७९ को लेखापरीक्षण प्रतिवेदन, अध्यक्षको प्रतिवेदन, आ.व. २०७९\०८० को अनुमानित आय ब्यय र लेखापरिक्षक नियुक्ति लगायतका प्रस्तावहरु सर्वसम्मतिले पारित गरेको छ ।
कार्यक्रममा एसोसियसनका अध्यक्ष प्रद्युमन पोखरेलले कोभिड १९, रुस युक्रेन युद्घ, बढ्दो मुद्रास्फिति लगायतका कारणले बैंकिङ् क्षेत्र निकै अप्ठ्यारो अबस्थाबाट गुज्रिरहेको बताए । पोखरेलले सबै सदस्य बैंकहरुलाई जोखिम व्यवस्थापनलाई अझ प्रभावकारी बनाउन र ग्राहक सेवालाई अझ चुस्त बनाउन अनुरोध गर्दै आफ्नो कार्यकालमा सहयोग पुर्याउने सबैमा आभार व्यक्त गरेका थिए ।
त्यस्तै नवनिर्वाचित अध्यक्ष सुयोग श्रेष्ठले आफुलाई अध्यक्ष पदमा निर्वाचित गरेकोमा धन्यवाद व्यक्त गर्दै सबैको सहयोगबाट बिकास बैंकहरुको हक र हितका लागि लागिपर्ने प्रतिबद्धता जनाए ।
उनले आजका बिकास बैंकहरु व्यसायका दृष्टिकोणबाट हिजोका बाणिज्य बैंकहरु जस्तै रहेको बताउँदै ९० वटा बिकास बैंक घटेर १७ मा आइपुग्दा पनि बजार हिस्साका हिसाबले पहिले जति नै कायम राख्नु सक्नु आजका बिकास बैंकहरुको उपलब्धि रहेको बताउदै सहकार्यका लागि सबै प्रमुख कार्यकारी अधिकृतहरुलाई अनुरोध गरे ।
