काठमाडौं । वैशाख १० मा हुँदै गरेको प्रतिनिधिसभातर्फको उपनिर्वाचनमा विशेषतः बारा–२ को चर्चा केही बढी देखिन्छ । जहाँ जनता समाजवादी पार्टीका अध्यक्ष उपेन्द्र यादवसहित केन्द्रीयरुपमै चर्चामा रहेका केही पात्र मैदानमा छन् ।
सत्ता साझेदार पाँच दलको सहयोग पाएका उपेन्द्र यादव उम्मेदवार बनिरहँदा राष्ट्रिय स्वतन्त्र पार्टीबाट रमेश खरेल, जनमत पार्टीबाट शिवचन्द्र कुशवाहा र एमालेबाट पुरुषोत्तम पौडेलसहित ३६ जनाले उम्मेदवारी दिएका छन् ।
बारा–२ मा यसअघि जसपाका रामसहायप्रसाद यादवले जितेका थिए । उनको मुख्य प्रतिस्पर्धा तत्कालिन समयमा माओवादी केन्द्रको तर्फबाट उम्मेद्वार बनेका शिवचन्द्र कुशवाहासँग थियाे । यादव उपराष्ट्रपति बनेसँगै यो निर्वाचन क्षेत्र रिक्त भएको थियो ।
बारा–२ मा विशेषतः यसअघि जसपा–एमाले गठबन्धन र माओवादी–कांग्रेस गठबन्धनबीच प्रतिस्पर्धा भएको थियो । जहाँ एमालेको मत पाएर जसपाका यादव विजयी बनेका थिए ।
तर, अहिले समीकरण पुरै फेरबदल भएको छ । कांग्रेस र माओवादीलगायतका पाँच दल जसपाको पक्षमा उभिएका छन् भने एमाले एक्लै छ । बारा–२ मा विशेषतः चर्चाको हिसाबले जसपाका उम्मेदवार यादव र जनमतका उम्मेदवार शिवचन्द्र कुशवाहाबीच प्रतिस्पर्धा हुने आकंलन गरिएको छ ।
प्रतिस्पर्धामा रमेश खरेल पनि छन् । तर, उनको अवस्था त्यति बलियो नभएको बताइन्छ । उनी यसअघि काठमाडौं क्षेत्र नम्बर १ बा पराजित भएका थिए ।
पाँच दलको समर्थनले उपेन्द्र बलिया
उपेन्द्र यादव यसअघि जनमत पार्टीका अध्यक्ष सिके राउतसँग सप्तरी–२ बाट भारी मतान्तरसहित पराजित भएका थिए । चुनावको चर्चा सुरु भएदेखि नै बारा–२ मा राउतले यादवविरुद्ध आक्रामकरुपमा चुनावी अभियान चलाइरहेका छन् । साथै, तत्कालिन समय माओवादी केन्द्रकै उम्मेदवारलाई भित्र्याएर आफ्नो उम्मेदवार पनि बनाएका छन् ।
जसको कारण बारा–२ मा बनेको माहोल उपेन्द्रका निम्ति त्यति सहज छैन । तथापी, सत्ता साझेदार पाँच दलले उपेन्द्रलाई सघाउने निर्णय गरेका छन् । उपेन्द्रलाई आफ्नो पार्टी जसपासहित नेपाली कांग्रेस, माओवादी केन्द्र, एकीकृत समाजवादी र लोकतान्त्रिक समाजवादी पार्टी (लोसपा)काे समर्थन छ ।
दलगत हैसियतलाई हेर्दा कांग्रेस, माओवादी, लोसपा बारामा प्रतिस्पर्धी पार्टी हुन् । यी दलको साथ पाउनुले यादवलाई जित सहज देखिन्छ । तथापी, माहोल व्यक्ति केन्द्रीत हुने हुँदा पनि अहिल्यै के हुन्छ भन्ने अवस्था छैन ।
समानुपातिक मतअनुसार ग्रीन जाेनमा उपेन्द्र
मंसिरमा भएको निर्वाचनमा बारा २ मा समानुपतिकमा जसपाले १३ हजार २४२ मत ल्याएर पहिलो पार्टी बनेको थियो । जहाँ नेपाली कांग्रेसले ११ हजार १७९, नेकपा एमालेले ९ हजार १९३, जनमत पार्टीले ८ हजार ८४६, लोसपाले ४ हजार २३५ मत ल्याएको थियो ।
यस्तै, नागरिक उन्मुक्तिले ३ हजार ७९४, माओवादी केन्द्रले ३ हजार २६५, नेपाल संघीय समाजवादी पार्टीले २ हजार ३६६, नेकपा एकीकृत समाजवादीले १ हजार ९९६, राष्ट्रिय स्वतन्त्र पार्टीले १ हजार ४५५ र राष्ट्रिय प्रजातन्त्र पार्टीले ९९२ मत ल्याएको थियो ।
अहिले तत्कालिन समयमा प्राप्त मतलाई हेर्दा उपेन्द्र ग्रीन जोनमा देखिन्छन् । यादवको पक्षमा सहजै बहुमत आउने देखिन्छ ।
