Sansar News
काठमाडौं । नेपाली नागरिकलाई भुटानी शरणार्थी बनाएर अमेरिका लैजाने भन्दै ठगी गरेको आरोपमा पक्राउ परेका सन्दीप रायमाझीलाई आज काठमाडौं ल्याइँदै छ ।
बुधबार बुटवलबाट पक्राउ परेका उनलाई बुद्व एयरको जहाजबाट काठमाडौं ल्याउन लागिएको बताइएको छ ।
उनलाई आज काठमाडौं ल्याउनका लागि बिहा ७ बजे नै भैरहवा विमानस्थलमा लगिएको र मौसमका कारण जहाज समयमै उड्न नसकेको जिल्ला प्रहरी कार्यालय रुपन्देहीका डिएसपी श्याम अर्यालले जानकारी दिएका छन् ।
सन्दीप नेकपा एमालेका सचिव टोप बहादुर रायमाझीका छोरा हुन् । उनीमाथि २०७७ सालमा झण्डै ८ सय बढी नेपाली नागरिकलाई नक्कली शरणार्थी बनाएर अमेरिका लैजान लागेको प्रकरणमा संलग्न रहेको आरोप लागेको छ । सोहि आरोपमा सचिव टोप बहादुर रायमाझीलाई पनि पक्राउ पुर्जी जारी गरिएको छ ।
सन्दीपसँगै यसअघि उक्त प्रकरणमा पूर्वगृहमन्त्री रामबहादुर थापा ‘बादल’ का सुरक्षा सल्लाहकार इन्द्रजित राई तथा केशव दुलाल, सानु भण्डारी, टंक गुरुङ, सागर राई र शन्देश शर्मा, लाई पक्राउ गरिएको थियो । प्रहरीले उक्त प्रकरणमा बुधबारै पूर्वगृहसचिव तथा हाल उपराष्ट्रपति कार्यालयमा कार्यरत सचिव टेकनारायण पाण्डे पनि पक्राउ परेका छन् ।
वि.सं.२०८० वैशाख २१ बिहीवार ०८:४० मा प्रकाशित
