हामी सबैकाे संसारन्यूज

काठमाडौं । माओवादी केन्द्रसहित चार दलबीच सोमबार समाजवादी मोर्चा घोषणा गर्न सहमति भएको छ । प्रधानमन्त्री निवास बालुवाटारमा बसेको माओवादी केन्द्र एकीकृत समाजवादी, जनता समाजवादी र नेपाल कम्युनिष्ट पार्टीको बैठकले भोलि नै घोषणा गरेर अगाडि बढ्ने सहमति गरेको हो ।

बैठकमा सहभागि जसपाका नेता राजेन्द्र श्रेष्ठले बताएअनुसार भोलि राष्ट्रिय सभागृहमा घोषणा सभा कार्यक्रम राखिनेछ ।

नेताहरुबीच मोर्चाको नेतृत्व आलोपालो गर्ने सहमति पनि भएको छ । तत्काललाई केन्द्रीय मोर्चा घोषणा गर्ने र आवश्यकताका आधारमा तल्लो तहसम्म संरचना बनाउने सहमति जुटेको श्रेष्ठले जानकारी दिए ।

मोर्चामा बाबुराम भट्टराई नेतृत्वको नेपाल समाजवादी पार्टीलाई पनि सहभागि गराउने गरी सहमति भएको बताइएको छ ।

तत्काल पार्टी एकता गर्ने अवस्था नरहेपछि दलहरु मोर्चा घोषणाको अवस्थामा पुगेका हुन् । मोर्चा निर्माणसँगै संसदमा मोर्चाको पक्षमा ५४ सिट पुग्नेछ ।