हामी सबैकाे संसारन्यूज

काठमाडौं । महानगरपालिकाले काठमाडौंमा संचालित सबै सहकारीलाई ३० दिनभित्र संस्थागत गतिबिधिको विवरण बुझाउन निर्देशन दिएको छ ।

महानगरको सहकारी विभागले बुधबार एक सूचना जारी गर्दै ३० दिनभित्र साधारणसभाको जानकारी, लेखापरीक्षणको प्रतिवेदन विवरण विभागमा बुझाउन निर्देशन दिएको हो ।

महानगरका मेयर बालेन साहले वित्तिय जोखिमबाट बच्न र सहकारीलाई संकटग्रस्त हुनबाट बचाउन बचतकर्ताले निरन्तर सहकारीको निगरानी गर्न समेत अनुरोध गरेका छन् ।

‘बस्तु र सेवाहरुको मूल्यबृद्धि र मुद्रा स्फितिले वित्तिय क्षेत्रहरुमा पारेको तरलताबाट सहकारी क्षेत्र पनि प्रभावित बनेका छन् । तरलताको अभाव सृजना भएको सर्वविदितै छ । महानगरपालिकाको सहकारी बिभागमा शेयर सदस्य र सञ्चालकहरुले दिने गरेका लिखित र मौखिक उजुरीको चापबाट अवस्था देखिन्छ,’ उनले भनेका छन्, ‘यस्तो संवेदनशील समयमा सहकारी संघ संस्थाहरुले आफ्नो काम कारवाहीलाई जिम्मेवार, इमान्दार, अनुशासित, पारदर्शी एवं विधिसम्मत तरिकाले सदस्य केन्द्रीत भई सञ्चालन एवं व्यवस्थापन गर्दै सहकारी सुशासन कायम गर्न अनुरोध गर्दछु ।’

मेयर बालेनले तोकिएको समयमा सबै शेयर सदस्यहरुलाई उपस्थित गराएर साधारणसभा सम्पन्न गरी संस्थाको यथार्थ स्थिति र कारोवार बारे जानकारी गराउन समेत अनुरोध गरेका छन् । उनले विश्वसनीयता र अपनत्व ग्रहण गराउनकालागि नियमित रुपले शेयर सदस्यहरुसँग सम्पर्क र संवाद बढाउन समेत अनुरोध गरेका छन् ।