हामी सबैकाे संसारन्यूज

काठमाडौं । कोशी प्रदेशका विभिन्न जिल्लामा अविरल वर्षापछि आएको बाढीका कारण भत्किएका पूल, सडक लगायतका भौतिक संरचना निर्माणका लागि प्रयाप्त जनशक्ति नभएको बताइएको छ ।

प्रतिनिधि सभाको बुधबारको बैठकमा नेकपा एमालेका सचिव तथा सांसद योगेश भट्टराईले सरकारको ध्यानाकर्षण गराउँदै वर्षाका कारण कतिपय जिल्लामा सम्पर्क विच्छेद भएको र भत्किएका पूल तथा सडक निर्माणका लागि जनशक्ति र प्राविधिकको कमी भएको बताए ।

भट्टराईले ताप्लेजुङ जिल्लालाई जोड्ने तीनवटा राजमार्गहरु अबरुद्ध भएको, पाँचथरको हिँवाखोलामा आएको बाढीले बगाएको पुल १०दिन भित्रमा बेलिब्रिज लगाएर आवतजावतलाई सहज बनाउने भनिएपनि अझै १०–१५ दिन लाग्ने बताए ।
‘डाइभर्सन खडा गरिएको थियो । हिँजो राति डाइभर्सन पनि बगायो । त्यसले ताप्लेजुङसँगको सम्पर्क सम्पूर्ण ढंगले बिच्छेद भएको छ । पुल भत्काएकोले तमोर करिडोर पनि विच्छेद छ । संखुवासभा, तेह्रथुम हुँदै मदनभण्डारी मार्गबाट पनि ताप्लेजुङसँगको सम्बन्ध विच्छेद छ ।’ सांसद भट्टराइले भने ।

उनले ताप्लेजुङमा मानविय संकट उत्पन्न भएको बताउँदै त्यहाँका विभिन्न क्षेत्रमा खाद्यान्न लगायत औषधिको संकट देखिएको बताए । उनले सरकारको ध्यानाकर्षण गराउँदै ती स्थानमा हवाई यातायातबाट भएपनि खाद्यान्न र औषधि पठाउन अनुरोध गरे ।

भत्किएका सडक र पूलहरु ज्ति तदारुकताका साथ मर्मत सम्भार हुनुपर्ने हो त्यहाँ काम सुरु भएपनि प्रयाप्त जनशक्ति र सडक इन्जिनियर प्राविधिकको अभाव रहेको बताए । दर्जनौ पुल र बाटोहरु भत्किएकोले तत्काल त्यसको मर्मत सम्भारमा ध्यान दिन अनुरोध गरे ।