हामी सबैकाे संसारन्यूज

काठमाडौं । संशोधन नभई बजेट पारित गर्न नदिने अडानमा देखिएको एकीकृत समाजवादी प्रधानमन्त्री पुष्पकमल दाहाल ‘प्रचण्ड’को आश्वासनपछि पारित गर्ने पक्षमा उभिएको छ ।

बुधबार नयाँ बानेश्वरस्थित संघीय संसद भवनमा बसेको संसदीय दलको बैठकले बजेटको पक्षमा मतदान गर्ने निर्णय गरेको हो ।

सांसद राजेन्द्र पाण्डेले जानकारी दिएअनुसार देखिएका कमीकमजोरी प्रधानमन्त्रीबाट सुधार गर्ने प्रतिबद्धता आएपछि मतदान गर्ने निर्णय गरिएको हो ।

“बजेटका कमीकमजोरी सुधार गर्ने आश्वासन आएको छ, आगामी दिनमा बजेट निर्माणको प्रणालीमै सुधार गरेर जाने प्रतिबद्धता पनि व्यक्त भएको छ”, पाण्डेले भने, “प्रतिबद्धताकै आधारमा हामीले बजेटको पक्षमा मतदान गर्ने निर्णय गरेका छौं ।”

यसअघि समाजवादीका अध्यक्ष स्वयम् माधवकुमार नेपालले पनि संशोधन नभई बजेट पारित हुन नदिने बताएका थिए ।