हामी सबैकाे संसारन्यूज

काठमाडौं । पत्नी वियोगले प्रधानमन्त्री पुष्पकमल दाहाल प्रचण्ड अहिले शोकमा छन् । गएको असार २८ गते उनकी पत्नी सिता दाहालको निधन भएको थियो । तर, शोकमै रहिरहँदा पनि प्रचण्ड नेतृत्वको सरकारले भने निकै लोकप्रिय कदमहरु चालेका छन् ।

सुशासन र सेवा प्रवाहको सन्दर्भमा प्रचण्ड नेतृत्वको सरकारले विशेषगरी तीन वटा महत्वपूर्ण कदमहरु चालेको छ ।

मिटरब्याजको कारण पीडित नागरिकले लामो समयदेखि आन्दोलन गर्दै आएका थिए । जसलाई सम्बोधन गर्न सरकारले विधेयक ल्याएको थियो । आइतबार बसेको प्रतिनिधिसभा बैठकले सरकारले ल्याएको ‘मुलुकी संहितासम्बन्धी केही नेपाल ऐनलाई संशोधन गर्न बनेको विधेयक २०८०’ सर्वसम्मतिले पारित गरेको छ । विधेयक पारित भएसँगै अनुचित आर्थिक लेनदेनमाथि फौजदारी कसुरअन्तर्गत अब कारबाही गर्न मिल्छ ।

यसैगरी, योबीचमा सरकारले साइबर क्राइम गर्नेहरुलाई धमाधम कानुनी कारबाही पनि अघि बढाएको छ । कानूनी दायराभन्दा बाहिर विभिन्न गतिविधि गर्नेहरु अहिले पक्राउ पर्न थालेका छन् । जसले साइबर क्राइमको बढ्दो जोखिमलाई कम गर्ने अपेक्षा गर्न सकिन्छ ।

सुशासनको सन्दर्भमा एकपछि अर्को कदम चालिरहेको सरकारले जनतालाई राहत दिनेगरी पेट्रोलियम पदार्थको मूल्य स्वचालित प्रणालीबाट तोक्ने व्यवस्था गरेको छ । नयाँ आर्थिक वर्षबाट लागु भएको यो व्यवस्थासँगै पेट्रोलियम पदार्थको मूल्य घटेको छ भने जनतालाई ठूलो राहत भएको छ ।