हामी सबैकाे संसारन्यूज

काठमाडौं । चार किलो सुन तस्करीमा संलग्न भएको आरोपमा पाँच जना पक्राउ परेका छन् । उनीहरुलाई जिल्ला प्रहरी कार्यालय दोलखाले पक्राउ गरेको हो ।

पक्राउ पर्नेमा बिगु गाउँपालिका-३ की सीता तामाङ, पेम्बा तामाङ, माधव मगर, बिगु- १ का नुर्बु शेर्पा र सुनमला तामाङ रहेको प्रहरीले जनाएको छ ।

बिहीबार राति दोलखाको बिगु गाउँपालिका-३ जामुनेबाट प्रहरीले चार किलो अवैध सुन बरामद गरेको थियो । चार किलो सुन तस्करी प्रकरणमा संलग्न भएको आरोपमा उनीहरुलाई पक्राउ गरिएको दोलखाका डीएसपी दीपक खड्काले जानकारी दिए ।

सीता तामाङको घरमा डेरा गरी बस्ने केशर तामाङले सुन तस्करी गरी लुकाई छिपाई राखेको सूचनाको आधारमा पुगेको प्रहरी टोलीले सुरुमा सीता, पेम्बा र माधवलाई पक्राउ गरेको थियो । पक्राउ परेका पाँचै जनालाई दोलखा प्रहरीले पत्रकार सम्मेलन गरी सार्वजनिक गरेको हो ।