हामी सबैकाे संसारन्यूज

काठमाडौं । नेकपा एमालेको केन्द्रीय नेतृत्वलाई बागमती प्रदेशको नेतृत्व चयनमा सकस भएको छ ।

असोज ८ गते सुरु भएको प्रदेश कमिटीको पहिलो अधिवेशनमा नेतृत्व चयनका लागि निर्वाचन हुने भनिएपछि सहमतिका नाममा पटक–पटक कार्यतालिका सारिए पनि निर्वाचन हुने टुंगो भने लाग्न सकेको छैन । प्रदेशको पहिलो अधिबेशन तथा निर्वाचनका लागि प्रदेशका ११ जिल्लाबाट काठमाडौंमा उपस्थित एघार सय बढी प्रतिनिधि अन्यौलमा परेका छन् ।

एमाले अध्यक्ष केपी शर्मा ओलीले उद्घाटनको पहिलोदिन सहमतिका आधारमा नेतृत्व चयनमा जोड दिएपछि अध्यक्षका आंकाक्षी पाँचजना देखिएका थिए ।
जसमा अध्यक्षमा उम्मेदवारी दिएका केशर बहादुर बुढाथोकी, कैलाश प्रसाद ढुंगेल, सानुकुमार श्रेष्ठ, कृष्ण प्रसाद दाहाल र केशव राज पाण्डेले अध्यक्ष पदका लागि उम्मेदवारी दर्ता गरेपनि बुढाथोकी, श्रेष्ठ र केशव पाण्डले उम्मेदवारी फिर्ता लिइसकेको अवस्थामा अध्यक्ष पदमा रामेछापका ढुंगेल र मकवानपुरका दाहाल तथा अन्य सबै पदमा निर्वाचन हुने भएको छ ।

त्यस्तै एक उपाध्यक्ष पदका लागि ईश्वर चन्द्र पोखरेल, दावा दोर्ज लामा, नारायण प्रसाद खतिवडा, राजेन्द्र प्रसाद खतिवडा र राजेन्द्र राजथलाबीच प्रतिश्पर्धा हुने भएको छ ।

त्यसैगरी प्रदेश सचिवका लागि पनि पूर्वसांसद नवराज सिलवाल र हस्त पण्डितबीच प्रतिश्पर्धा हुने भएको छ ।

त्यस्तै प्रदेश कमिटीका लागि सिन्धुपाल्चोक, काभ्रे, चितवन र रसुवाबाट सर्वसम्मत नेतृत्वको टुंगो लागिसकेको छ भने अन्य जिल्लाबाट पनि केही नेताहरु निर्विरोध निर्वाचित भएको बताइएको छ ।