हामी सबैकाे संसारन्यूज

काठमाडौँ -दोलाखा ।   सुनजस्तो देखिने चार किलो पहेलो धातुसहित पाँच जना पक्राउ परेका छन् ।

बिगु गाउँपालिका १ मा बस्ने २८ वर्षीय केशर तामाङ, २० वर्षीय माधव मगर, १९ वर्षीय पेम्बा तामाङ, ५५ वर्षीय नुर्वु छिरीङ शेर्पा र ३० वर्षीया सुनमाला पक्राउ परेका हुन् ।

बिगु गाउँपालिका ३ जामुनेमा डेरा गरी बस्ने तामाङकाे कोठामा अवैध रूपमा तस्करी गरी ल्याएको सुन लुकाई छिपाई राखेको भन्ने विशेष सूचनाको आधारमा जिल्ला प्रहरी कार्यालय दोलखा र ईलाका प्रहरी कार्यालय सिंगटीबाट खटिएको प्रहरी टोलीले तामाङको कोठा तलासी गर्ने क्रममा  उक्त धातु फेला पारेका हुन् ।

प्रहरीले धातु बरामद गरी घटनास्थल वरपरबाट केशर, पेम्बा र माधवलाई बुधबार पक्राउ गरेको हो । त्यस्तै अनुसन्धानको क्रममा संलग्नतामा खुल्न आएकाे नुर्वु छिरीङ र सुनमालालाई भिमेश्वर नगरपालिका ६ स्थित शुभकामना होटलबाट बिहीबार प्रहरीले पक्राउ गरेको हो ।

उनीहरुलाई भन्सार ऐन, २०६४ तथा संगठित अपराध निवारण ऐन, २०७० अन्तर्गत मुद्दामा जिल्ला अदालत दोलखाबाट ८ दिन म्याद थप गरी प्रहरीले आवश्यक अनुसन्धान गरिरहेको छ ।