Sansar News
काठमाडौं । कोशी प्रदेशका मुख्यमन्त्री हिक्मत सिंह कार्कीले आज प्रदेशसभाबाट विश्वासको मत लिने भएका छन् ।
संविधानको धारा १६८ को उपधारा ३ अनुसार गत भदौ २२ गते मुख्यमन्त्री बनेका कार्कीले मुख्यमन्त्री बनेको ३० दिनभित्र विश्वासको मत लिइसक्नुपर्ने भएकाले आज प्रदेश सभामा विश्वासको मत माग्ने भएका हुन् ।
यसअघि नेपाली कांग्रेस र नेकपा माओवादी केन्द्रसहितको गठनबन्धनबाट मुख्यमन्त्रीमा नियुक्त उद्धव थापाले विश्वासको मत लिने क्रममा सभाध्यक्षको मत समेत प्रयोग गरेपछि सर्वोच्च अदालतले उनलाई पदबाट हटाएको थियो । थापा हटेपछि प्रदेश सभामा सबैभन्दा धेरै सांसद रहेको नेकपा एमाले संसदीय दलका नेता कार्की सर्वोच्चको परमादेशबाट मुख्यमन्त्रीमा नियुक्त भएका थिए ।
प्रदेश सभामा एमालेका ४० सांसद छन् । यद्यपी उपसभामुख सिर्जना दनुवारले सभाको अध्यक्षता गरेपछि कार्कीले ३९ सदस्यको मात्र मत पाउने देखिएकोले विश्वासको मत पूरा गर्न उनलाई कठिन हुने देखिन्छ ।
कार्कीले आफुलाई विश्वासको मत दिन भन्दै प्रदेश सभामा रहेका सबै दललाई पत्रसहित अनुरोध गरेका छन् । कार्कीले आज दिउँसो बस्ने प्रदेश सभाको बैठकबाट विश्वासको मत लिँदैछन् । अन्य दलले मत नदिने बताइरहँदा राष्ट्रिय प्रजातन्त्र पार्टीले भने मत दिने समयमा निर्णय गर्ने जनाएको छ ।
वि.सं.२०८० असोज २० शनिवार १०:१२ मा प्रकाशित
