हामी सबैकाे संसारन्यूज

काठमाडौं । नेपाल समाजवादी पार्टीले इजरायलमा रहेका नेपालीलाई सुरक्षा तथा सुरक्षितरुपमा नेपाल फर्काउनका लागि पहल गर्न सरकारसँग आग्रह गरेको छ ।
इजरायलमाथि हमासले गरेको आक्रमणको भत्र्सना गर्दै शान्ति र स्वतन्त्रता नै मानव जातीको सुख रहेको भन्ने मान्यतालाई पार्टीले पूर्ण विश्वास गरेको समेत बताएको छ ।
पार्टीको केन्द्रीय कार्यालयका तर्फबाट रोशन पोखरेलद्धारा जारी विज्ञप्तिमा भनिएको छ ‘इजरायलमा भएको आक्रमणले, इजरायलमा रोजगारी र अध्ययनको सिलसिलामा बसोबास गर्ने नेपाली दाजुभाइ तथा दिदीबहिनीहरु पनि प्रभावित भएको र त्यहाँस्थित नेपाली दूतावासले सार्वजनिक गरेको विवरण अनुसार घाइते नेपालीमध्ये २ जनाको स्थिति गम्भीर रहेको छ,’ विज्ञप्तिमा भनिएको छ, ‘घाईते हुनुभएका नेपालीहरुको उद्धार र उपचारमा कुनै कमी हुन नदिन इजरायलस्थित नेपाली दूतावासलाई आग्रह गर्दछौं । उहाँहरुको सुरक्षा अवस्थाबारे हाम्रो पार्टी अत्यन्तै चिन्तित छ ।’
सो पार्टीले नेपाल सरकार तथा इजरायलस्थित नेपाली दूतावासले सक्रियता बढाएर सम्पूर्ण नेपालीलाई सुरक्षित स्थानमा स्थान्तरण गराई स्वदेश फर्काउने प्रक्रियालाई यथाशीघ्र रुपमा अघि बढाउन आग्रह समेत गरेको छ ।
त्यस्तै इजरायलमा बसोबास गर्ने सबै नेपाली नागरिकहरुलाई आवासीय नेपाली दूतावासको सम्पर्कमा आइदिन पनि सो पार्टीले अनुरोध गरेको छ ।