हामी सबैकाे संसारन्यूज

काठमाडौं । परराष्ट्र मन्त्री एनपी साउदले हमासको आक्रमणपछि इजरायलमा बेपत्ता भएका कञ्चनपुरका विपिन जोशीको खोजी भइरहेको बतएका छन् ।

इजरायलबाट २५४ जना नेपाली नागरिक लिएर नेपाल फर्किएपछि गएराति त्रिभुवन अन्तर्राष्ट्रिय विमानस्थलमा मन्त्री साउदले सञ्चारकर्मीसंग कुरा गर्दै यस्तो बताएका हुन् । नेपाली नागरिकहरु ल्याउन परराष्ट्र मन्त्री साउद आफै पनि त्यसतर्फ गएका थिए ।

मन्त्री साउदले युद्धग्रस्त क्षेत्रमा रहेका अन्य मुलुकका नागरिकहरुको सुरक्षाप्रति इजरायल सरकार प्रतिबद्ध रहेको आफूले पाएको बताए । मन्त्री साउन नेपाली नागरिकलाई लिन इजरायल गएको चार्टर विमानमै त्यता गएका थिए ।

इजरायलको जोखिमयुक्त क्षेत्रबाट नेपाल फर्किन ५५७ जनाले विवरण उपलव्ध गराएको बताए । त्यसमध्ये ५०३ ले तुरुन्तै नेपाल फर्काउन अनुरोध गरका जानकारी दिए । उनले इजरायलको द्वन्द्वग्रस्त क्षेत्रबाट ५४ जनालाई सुरक्षित स्थानमा सारिएको जानकारी दिए । आक्रमणबाट घाइते भएका चारमध्ये एक जना सँगै फर्किएको र बाँकी तीन जनाको इजरायलमै उपचार चलिरहेको मन्त्री साउदले बताए ।