Sansar News
काठमाडौं । निर्वाचन आयोग नेपालले उपनिर्वाचन हुने क्षेत्रमा मतदाता नामावलीमा नाम दर्ता गर्न आह्वान गरेको छ । निर्वाचन आयोगले रिक्त भएका २३ पदमा उपनिर्वाचन गर्ने तयारी गरिएको भन्दै सम्बन्धित स्थानीय तह र निर्वाचन क्षेत्रमा चुनावको मिति तोकिनुअघि नै छुटेका र उमेर पुगेका नागरिकले नामावली दर्ता गर्न आह्वान गरेको हो ।
यसअघि वि.सं. २०७९ वैशाख १० गते स्थानीय तह निर्वाचन तथा २०७९ मंसिर ४ गते प्रतिनिधि सभा र प्रदेश सभा सदस्यको निर्वाचन भएको थियो । त्यस पश्चात् स्थानीय तह, प्रतिनिधि सभा र प्रदेश सभा सदस्यका २३ पदहरू विभिन्न कारणले रिक्त रहेको छ ।
आयोगले नियमितरुपमा प्रदेश तथा जिल्ला निर्वाचन कार्यालयहरू मार्फत मतदाता नामावली दर्ता गर्ने कार्य गर्दै आएको छ । साथै नागरिकको सहजताको लागि बाह्य जिल्लाबाट मतदाता नामावली दर्ता गर्न सकिने सुविधा समेत उपलब्ध गराएको आयोगले जनाएको छ ।
वि.सं.२०८० माघ २२ सोमवार १२:५० मा प्रकाशित
