हामी सबैकाे संसारन्यूज

अमेरिका । अमेरिकाको भर्जिनिया राज्यको आश्बर्न शहरको एक पुस्तकालयमा भजन शिरोमणी स्व भक्तराज आचार्यलाई श्रद्धासुमन अर्पण गर्दै सांगीतिक श्रद्धान्जली समारोह सम्पन्न गरिएको छ ।

सांगीतिक श्रद्धान्जली समारोहमा भजन शिरोमणी स्व भक्तराज आचार्यका कालजयी गीतहरु प्रस्तुत गरियो । साथै त्यहाँ उनका तस्बिरमा समारोह अगाडी नै पुष्पगुच्छा तथा माल्यार्पण गरिदै श्रद्धान्जली दिईएको थियो ।

कार्यक्रममा कुनै आसन र भाषण नराखी समारोहको समन्वय गरेका संचारकर्मी सहदेव पौडेलले कार्यक्रमको शुभारम्भ गरेका थिए । पौडेलले कार्यक्रम उद्धेश्यबारे र संक्षेपमा भजन शिरोमणी स्व आचार्यको बारेमा प्रकाश पारेका थिए ।

आमन्त्रित गरिएका डा अनुप पहाडी (विद्या वारिधि) तथा दिनेश आचार्यले संक्षेपमा भजन शिरोमणी स्व भक्तराज आचार्यको बारेमा बोलेका थिए । वक्ता दुवैले भजन शिरोमणीले ४०० भन्दा ज्यादा गीत गएको र उनको बाल्यकाल जीवनको साथै संघर्षका बारेमा समेत बोलेका थिए ।

डा पहाडी गीतकार पनि भएकोले उनका सुपुत्रहरु सत्य र स्वरुपले आफ्नो गीत गएको सन्दर्भ उल्लेख गर्दै नेपालमा भजन शिरोमणीसँग भेटघाट भएको बताए ।

सांगीतिक श्रद्धान्जली समारोहमा गायक तथा संगीतकार तथा सत्य तथा स्वरुपका गुरु समेत रहेका श्याम सुन्दर आचार्यले मन्त्रमुग्ध हुने कालजयी प्रख्यात गीतहरु प्रस्तुत गरेका थिए । उनले सुरुवात भजनबाट गरेका थिए । उनले हजार सपना, मुटु जलि रहेछ, यहा छन् बुद्धका आँखा, माया मेरी साँझ बनि लगायत करिव आधा दर्जन गीत प्रस्तुत गरे । त्यस्तैगरी कलाकार आयुष पुडासैनीले पनि बीच मै हजार आँखा हेर्ने एक गीत प्रस्तुत गरेका थिए ।

गायक श्याम सुन्दर आचार्यलाई दिपक आचार्य, रुपक श्रेष्ठ, आयुष पुडासैनीले साथ दिएका थिए ।

कार्यक्रम संचालन संचारकर्मी सहदेव पौडेलले गरेका थिए भने उनले समापन गर्नु अघि एउटा गीत प्रस्तुत गरेका थिए । कार्यकम ठिक १ घण्टा भित्र समापन गरिएको थियो ।