हामी सबैकाे संसारन्यूज

काठमाडौं । बन्द भएका निजी पेट्रोल पम्प आजै देखि खुल्ने भएका छन् । आन्दोलनरत पेट्रोलियम ढुवानी व्यवसायी र सरकारबिचको सहमतिपछि पेट्रोलियम पदार्थको आपूर्ति सहज हुने भएको हो ।

नेपाल आयल नियमका नायब कार्यकारी निर्देशकको संयोजकत्वमा एक समिति गठन गरी १५ दिनभित्र मजदुरका माग सम्बोधन गर्ने र आजैदेखि पेट्रोलियम पदार्थको ढुवानी सुचारु गर्ने सहमति भएको निगमका प्रवक्ता मनोज ठाकुरले जानकारी दिए ।

सोमबार उद्योग, वाणिज्य तथा आपूर्ति मन्त्रालयमा भएको छलफलमा यस्तो सहमति जुटेको हो । यससँगै थानकोट डिपोबाट अब निजी पेट्रोल पम्पहरूमा पेट्रोलियम पदार्थको आपूर्ति हुनेछ । पेट्रोलियम पदार्थ आपूर्ति नहुँदा आइतबारदेखि काठमाडौंका निजी पेट्रोल पम्पले पेट्रोल वितरण बन्द गरेका थिए ।

के थियो ट्याङ्कर मजदुरको माग ?
नेपाल पेट्रोलियम ट्याङ्कर चालक सङ्घले विभिन्न माग राखी आइतबारदेखि पेट्रोलियम पदार्थको ढुवानी बन्द गरेका थिए । मजदुरहरूले सबै ट्याङ्कर चालक÷सहचालक मजदुरको श्रम ऐन अनुसार नियुक्ति पत्र दिई नेपाल सरकारले तोके अनुसार तलबको व्यवस्था गर्न माग गरेका छन् ।

स्वरोजगारको हकमा मात्र लागू गरिएको दोब्बर बैङ्क ग्यारेन्टी र वार्षिक नवीकरण खारेज गर्न समेत माग गरिएको छ । टेम्प्रेचरको सही व्यवस्थापन गरिनुपर्ने, सामाजिक सुरक्षा कोषमा आबद्ध गरिनुपर्ने, ५० लिटरभन्दा बढी नाममा परेको दोब्बर प्रकरण खारेज गरिनुपर्ने, चालक र सहचालकलाई जोखिम भत्ताको व्यवस्था गरिनुपर्ने, चालक तथा सहचालकलाई प्रत्येक तीन महिनामा सुरक्षा सतर्कता तालिमको व्यवस्था गरिनुपर्ने माग गरिएको छ ।