Sansar News
काठमाडौं । चालु आर्थिक वर्षको जेठ मसान्तसम्म ४४ अर्ब ४० करोड रुपैयाँ प्रत्यक्ष वैदेशिक लगानी प्रतिबद्धता आएको छ । गएको आर्थिक वर्षको तुलनामा अहिले १० अर्बभन्दा धेरै हो । अघिल्लो आर्थिक वर्ष जेठसम्म ३४ अर्ब ५८ करोड रुपैयाँ बराबरको वैदेशिक लगानीको प्रतिबद्धता आएको थियो ।
उद्योग विभागका अनुसार जेठसम्म तीन सय ५९ वटा प्रत्यक्ष वैदेशिक लगानीका प्रस्ताव स्वीकृत भएका छन् । जेठमा मात्र ५२ वटा प्रस्ताव स्वीकृत भएको विभागको तथ्यांकमा उल्लेख छ । विभागका अनुसार जेठमा तीन अर्ब रुपैयाँ बराबरको वैदेशिक लगानी स्वीकृत भएको छ । यस वर्ष स्वीकृत भएको एफडीआईबाट २० हजार एक सय ४६ जनालाई रोजगारी सिर्जना हुने अनुमान छ ।
जेठमा भित्रिएको विदेशी लगानीबाट दुई हजार तीन सय २३ जनालाई रोजगारी सिर्जना हुने अनुमान गरिएको छ । छ अर्ब रुपैयाँभन्दा कमको लगानीका लागि उद्योग विभागबाट स्वीकृति दिने कानुनी व्यवस्था छ । छ अर्ब भन्दा धेरै लगानीमा सञ्चालन हुने परियोजनाका लागि भने लगानी बोर्डबाट स्वीकृति लिनुपर्ने प्रावधान छ ।
पछिल्लो तथ्याङ्क अनुसार नेपालमा सुरुवातदेखि हालसम्म कुल प्रत्यक्ष वैदेशिक लगानी करिब पाँच खर्ब पुगेको छ । अहिलेसम्म छ हजार दुई सय १८ वटा विदेशी लगानी स्वीकृत भइसकेको छ । स्वीकृत लगानीबाट तीन लाख २९ हजार छ सय ५५ जनालाई रोजगारी सिर्जना हुने अनुमान छ ।
तथ्याङ्क अनुसार नेपालमा साना उद्योगमा धेरै विदेशी भित्रिएको पाइएको छ । यस वर्ष कुल तीन सय ४१ वटा साना उद्योगमा एफडीआई आएको छ । मध्यम स्तरीय उद्योगमा १४ र ठुला उद्योगमा ४ वटा मात्र प्रस्ताव स्वीकृत भएको छ । जेठमा ५१ वटा साना उद्योगमा विदेशी स्वीकृत भएको छ । एउटा मात्र मझौला उद्योगमा प्रत्यक्ष वैदेशिक लगानी स्वीकृत भएको विभागले जनाएको छ ।
प्रत्यक्ष वैदेशिक लगानीको आकर्षण पर्यटनमा अधिक देखिन्छ । यस वर्ष स्वीकृत कुल एफडीआईमध्ये पर्यटनमा मात्र आधा भित्रिएको छ । पर्यटनमा एक सय ७६ वटा प्रस्ताव स्वीकृत भएको छ । यो कुल प्रस्तावको ४९ प्रतिशत हो । सेवा क्षेत्रमा एक सय १४ वटा प्रस्ताव स्वीकृत भएको छ । जुन कुल प्रस्तावको ३२ प्रतिशत हो । उत्पादनमा ४० वटा प्रस्ताव स्वीकृत भएका छन् । सूचना प्रविधिमा १०, कृषिमा आठ, पूर्वाधारमा सात, खानीमा तीन र ऊर्जामा एक वटा प्रस्ताव स्वीकृत भएको विभागको तथ्यांकमा छ ।
वि.सं.२०८१ असार ४ मंगलवार १०:५३ मा प्रकाशित
