हामी सबैकाे संसारन्यूज

काठमाडौं । नेपाली कम्युनिस्ट पार्टीका नेता नारायणकाजी श्रेष्ठले हालैको निर्वाचन परिणामलाई आधार बनाएर पार्टीले गम्भीर आत्मसमीक्षा गर्दै नयाँ नीति र योजना तय गरेर अघि बढ्नुपर्ने बताएका छन्।

सामाजिक सञ्जाल फेसबुकमार्फत उनले वर्तमान राजनीतिक परिस्थितिको वस्तुनिष्ठ विश्लेषण र संश्लेषण आवश्यक रहेको उल्लेख गर्दै त्यसका आधारमा पार्टीले आगामी रणनीति निर्माण गर्नुपर्ने धारणा व्यक्त गरेका हुन्।

श्रेष्ठका अनुसार पार्टीभित्र एकता, ध्रुवीकरण, सहकार्य तथा संयुक्त मोर्चाको माध्यमबाट समग्र रूपान्तरण र पुनर्गठनको प्रक्रिया अघि बढाउन आवश्यक छ। उनले पार्टीलाई पुनर्गठित गर्दै देश र जनताको हितमा संघर्षका कार्यक्रम र नीति तयार गरी दृढतापूर्वक अघि बढ्नुपर्ने बताएका छन्।

उनले पार्टीको कार्यदिशा शान्तिपूर्ण परिवर्तनमा आधारित रहेको उल्लेख गर्दै निर्वाचन र सरकारमार्फत हुने कामलाई महत्वपूर्ण मानिए पनि त्यसलाई मात्र सम्पूर्ण राजनीतिक कार्यको रूपमा लिन नहुने बताए।

श्रेष्ठले धैर्य, विवेक र साहसका साथ पार्टीलाई सुदृढ बनाउँदै जनताको पक्षमा प्रतिबद्ध भएर अघि बढ्नुपर्ने आवश्यकता पनि औँल्याएका छन्।