हामी सबैकाे संसारन्यूज

काठमाडौँ । चिनियाँ उपविदेशमन्त्री सुन वेइडोङ नेपाल भ्रमणका क्रममा बेल्ट एण्ड रोड इनिसिएटिभ (बीआरआई) लाई अघि बढाउन आवश्यक कार्यान्वयन योजना दस्ताबेजमा हस्ताक्षर गर्ने भनिए पनि हुन सकेन । उनी नेपाल भ्रमण पुरा गरेर स्वदेश फर्किएका छन् ।

सोमबार नेपाल आएका चिनियाँ उपविदेशमन्त्री वेइडोङले स्वदेश फर्किनु अघि परराष्ट्र मन्त्री नारायणकाजी श्रेष्ठसँग भेटवार्ता गरेका थिए । परराष्ट्र मन्त्रालयमा भएको भेटमा कार्यान्वयन योजना दस्ताबेजबारे छलफल भए पनि सहमति जुट्न सकेन ।

केही विषयमा थप छलफल गर्नुपर्ने देखिएकाले दस्ताबेजले अन्तिम रूप पाउन नसकेको स्रोतले बताएको छ । नेपालले १२ मे २०१७ मा बीआरआईमा हस्ताक्षर गरेको थियो । तर अहिलेसम्म कुनै पनि परियोजना ल्याएको छैन ।