हामी सबैकाे संसारन्यूज

पोखरा । प्रधानमन्त्री केपी शर्मा ओलीले पोखरा विमानस्थल सञ्चालनको विषयलाई चिन भ्रमणको एजेण्डा बनाउने बताएका छन् ।

गण्डकी प्रदेशका पर्यटनमन्त्री मित्रलाल बस्याल नेतृत्वको टोलीसँगको भेटमा प्रधानमन्त्री ओलीले यस्तो बताएका हुन् ।
गण्डकीका पर्यटनमन्त्री बस्यालले पोखराबाट उडान सुरु भएको २ वर्षसम्म पनि पोखरा विमानस्थल अन्तर्राष्ट्रिय चार्टर्ड उडानमा मात्र सीमित भएको भन्दै प्रधानमन्त्री ओलीको ध्यानाकर्षण गराएका थिए ।

संघीय पर्यटनमन्त्री बद्रिप्रसाद पाण्डे, नागरिक उड्डयन प्राधिकरणका महानिर्देशक प्रदीप अधिकारीसहित मंगलबार प्रधानमन्त्रीलाई भेटेको गण्डकीका पर्यटनमन्त्री नेतृत्वको टोलीले अन्तर्राष्ट्रिय उडान पनि नहुने र पोखरा जोड्ने प्रमुख राजमार्गको हालत पनि खराब हुँदा पर्यटन क्षेत्रमा ठूलो क्षति पुगेको बताएका थिए ।

अन्तर्राष्ट्रिय उडान हुन नसक्दा पोखरामात्रै नभएर गण्डकी क्षेत्रकै पर्यटन क्षेत्रमा प्रत्यक्ष असर परेको गण्डकी प्रदेशका उद्योगी तथा पर्यटन व्यवसायीहरुको भनाइ छ ।

प्रधानमन्त्री ओली पोखरा विमानस्थल सञ्चालनबारे आफू चिन्तित रहेको र यसबारे कूटनीतिक पहल गर्ने बताए । उनले आसन्न चीन भ्रमणमा पोखरा अन्तर्राष्ट्रिय विमानस्थलबारे एजेण्डा बनाउने आश्वासन दिएको गण्डकीका पर्यटनमन्त्री बस्यालले बताए ।

‘प्रधानमन्त्रीजीले पोखरा र त्यहाँको विमानस्थल सञ्चालन गर्नेबारे आफू गम्भीर रहेको बताउनु भयो । उहाँले चीन भ्रमणमा यसलाई एजेण्डा नै बनाउँछु भन्नुभएको छ,’ पर्यटनमन्त्री बस्यालले भने ।