हामी सबैकाे संसारन्यूज

काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले ‘जनयुद्ध दिवस’लाई राष्ट्रिय दिवसको रूपमा स्थापित गरेरै छाड्ने बताएका छन् ।

३०औँ ‘जनयुद्ध दिवस’को सन्दर्भमा बिहीबार पार्टी केन्द्रीय कार्यालय पेरिसडाँडामा आयोजित कार्यक्रमलाई सम्बोधन गर्दै प्रचण्डले यस्तो बताएका हुन् । अहिले शान्ति प्रक्रिया नटुंग्याएको कारण देखाएर अदालतले स्थगन गरेपनि यो ‘राष्ट्रिय दिवस’ भएको र यसलाई राष्ट्रिय दिवसको रूपमा स्थापित गरेरै छाड्ने उनले दृढता व्यक्त गरे ।

पूर्वप्रधानमन्त्रीसमेत रहेका प्रचण्डले भने, ‘हामी अहिले संघीय लोकतान्त्रिक गणतन्त्रअन्तर्गत सुशासन, सामाजिक न्याय र समृद्धिको अभियानमा छौं। यसको मुख्य प्रेरणा जनयुद्ध नै हो । हामी जनयुद्ध र जनआन्दोलनबाट प्राप्त उपलब्धिलाई रक्षा र विकास गरेर संघीय लोकतान्त्रिक गणतन्त्र हुँदै समाजवादको आधार तयार गर्ने यात्रामा छौं ।’

उनले जनयुद्धको प्रेरणा सयौं वर्षसम्म रहिरहने समेत बताए । जनयुद्धलाई मेटाउने प्रयास गरेमा खरानी हुने सोत उनले चेतावनी दिए । प्रचण्डले भने, ‘जनयुद्ध नेपालको इतिहासमा सबैभन्दा ठूलो युगान्तकारी परिवर्तन गराउने परिघटना थियो । यसले आज मात्र होइन, सयौं वर्षसम्म पनि प्रेरणा दिइरहने छ। यसलाई कसैले मेटाउन सम्भव छैन, जसले मेटाउने प्रयास गर्छ, उ खरानी हुनेछ ।’

जनयुद्ध र जनआन्दोलनको बलमा बनेको संविधानमा स्थापित मान्यतालाई एकथरि तत्वले अस्वीकार गर्ने र जनताका अधिकार कुण्ठित गर्ने प्रयास गरिरहेको उल्लेख गर्दै प्रचण्डले यी सबै प्रयास असफल पार्न आफूहरूले निरन्तर अग्रगमनका लागि संघर्ष गरिरहेको दावी गरे ।