हामी सबैकाे संसारन्यूज

काठमाडौं । नेकपा एमालेका अध्यक्ष केपी शर्मा ओलीले प्रतिनिधि सभा विघटन असंवैधानिक भएको भन्दै यसको पुनर्स्थापनाको माग लिएर अघि बढ्ने बताएका छन्।

भक्तपुरको गुण्डुमा आयोजित एमाले कार्यक्रममा ओलीले लोकतन्त्रको रक्षा गर्न संसद् पुनर्स्थापना आवश्यक भएको बताए। उनले भने, “संसद् विघटन असंवैधानिक, गैरकानूनी र अलोकतान्त्रिक छ। देशहित विपरीतको यो कदम सह्य हुँदैन। कतिपय भन्छन् फागुन २१ गते चुनाव भएन भने पछि मात्र माग गरौंला, तर पर्खनुपरेको छैन।”

प्रतिनिधि सभा पुनर्स्थापनाको मागमा जनता सडकमा आउने उनले विश्वास व्यक्त गरे। ओलीले भने, “हामी अघि बढ्ने बेला आएको छ। नेपाली जनता आन्दोलनको आँधी–तुफान सिर्जना गरेर अघि बढ्नेछन्।”

सांसद विघटनको प्रसङ्गमा उनले सुशीला कार्कीको प्रधानमन्त्री बन्ने अडानसँग जोडेर असंवैधानिक कदम उठाइएको बताए। “संसद् विघटन गर्ने अधिकार कसले पायो? संविधान मिच्ने अधिकार कसबाट पायो?” ओलीले प्रश्न उठाए।

ओलीले भने, “संविधान र संसद् जोगाएर निकास खोज्ने सहमति सबै पक्षसँग थियो। तर राजनीतिक दलहरूलाई पन्छाएर वार्ता, सरकार बनाउने र संसद् भंग गर्ने काम गरिएको हो।”

प्रतिनिधि सभा पुनर्स्थापनाको एजेन्डामा कांग्रेसको पनि साथ रहने उनले बताए।