Sansar News
काठमाडौ । नेपाली कांग्रेसका सभापति शेरबहादुर देउवा जेनजी आन्दोलनपछि पहिलोपटक सार्वजनिक भएका छन् । उनले पार्टी केन्द्रीय कार्यालय सानेपामा बसेको केन्द्रीय समिति बैठकमा उपस्थित भएर सम्बोधन पनि दिएका छन् ।
देउवाले सम्बोधनका क्रममा गत २३ र २४ गते भएको जेनजी आन्दोलनका क्रममा ज्यान गुमाउनेहरूप्रति श्रद्धाञ्जली व्यक्त गरेका छन् ।
सभापति देउवाले फागुन २१ गते निर्वाचनको मिति घोषणा भए पनि स्वतन्त्र, निष्पक्ष र भयरहित वातावरणमा निर्वाचन हुन नसकेको उल्लेख गर्दै सबै दलको सहभागिता सुनिश्चित गर्न सरकारलाई आवश्यक कदम चाल्न सुझाएका छन् ।
देउवाले भने, “सरकारले फागुन २१ मा निर्वाचनको मिति घोषणा गरेको छ । तर स्वतन्त्र, निष्पक्ष र भयरहित वातावरण बन्न सकेको छैन । निर्वाचनका लागि आवश्यक वातावरण बनाउन सके मात्र सबै दलहरू निर्वाचनमा सहभागी हुने अवस्था बन्छ । त्यसतर्फ सरकारको ध्यान जानुपर्छ ।”
उनले निर्वाचनको वातावरण निर्माणमा ढिलाइ भए राजनीतिक स्थिरता र लोकतान्त्रिक प्रक्रियामा असर पर्न सक्ने चेतावनी पनि दिएका छन् ।
वि.सं.२०८२ असोज २८ मंगलवार १५:५३ मा प्रकाशित
