हामी सबैकाे संसारन्यूज

काठमाडौंः नेपाल राष्ट्र बैंकले महेन्द्र राजमार्ग र मध्यपहाडी लोकमार्ग विस्तारका कारण मर्कामा परेका व्यवसायीहरूका लागि विशेष राहत प्याकेज घोषणा गरेको छ । राष्ट्र बैंकले ‘एकीकृत निर्देशन, २०८२’ मा संशोधन गर्दै सडक विस्तारका कारण विस्थापित भएका उद्यम तथा व्यवसायहरूको ऋणलाई पुनरतालिकीकरण वा पुनरसंरचना गर्न पाउने व्यवस्था गरेको हो ।

के के राहतका लागि सर्तहरु ?

राष्ट्र बैंकले सडक विस्तारले गर्दा व्यवसाय प्रभावित भएका ऋणीले आफैं बैंकमा गएर ऋण मिलाउनका लागि अनुरोध गर्नुपर्ने व्यवस्था गरेको छ । त्यस्तै ऋणको पुनरतालिकीकरण वा पुनरसंरचना गर्नका लागि बुझाउनुपर्ने ब्याजको कम्तीमा १० प्रतिशत रकम असुलउपर भएको हुनुपर्ने व्यवस्था पनि गरेको छ ।

यस्तो सुविधा लिन चाहने व्यवसायीले २०८३ असार मसान्तभित्र प्रक्रिया पूरा गरिसक्नुपर्ने राष्ट्र बैंकले जनाएको छ । बैंक तथा वित्तीय संस्थाले ऋणीको नगद प्रवाह र आम्दानीको विश्लेषण गरेर मात्र यो सुविधा दिने विश्वास लिएको छ ।

यो किन महत्वपूर्ण छ ?

धेरै व्यवसायीहरू राजमार्ग विस्तारका कारण आफ्नो थातथलो र व्यवसायबाट विस्थापित भई ऋण तिर्न नसक्ने अवस्थामा पुगेका थिए । यो नयाँ व्यवस्थाले उनीहरूलाई खराब ऋणी हुनबाट जोगाउनेछ र व्यवसायलाई पुनर्जीवन दिन थप समय प्रदान गर्नेछ ।

पुनरतालिकीकरण भनेको के हो?

जब कुनै ऋणीले तोकिएको समयमा किस्ता तिर्न सक्दैन, तब बैंकले उसको समस्या बुझेर ऋण तिर्ने समय अवधि थपिदिने वा किस्ताको रकम घटाइदिने प्रक्रियालाई नै पुनरतालिकीकरण भनिन्छ । नेपाल राष्ट्र बैंकले समय समयमा उद्योगी व्यवसायीहरुको हितलाई मध्यनजर गर्दै कर्जा पुनरतालिकीकरणको व्यवस्था गर्न बैंक तथा वित्तिय संस्थाहरुलाई निर्देशन गर्दै आएको छ ।