हामी सबैकाे संसारन्यूज

काठमाडौं । साताको दोस्रो कारोबार दिन सोमबार नेपाल स्टक एक्सचेञ्ज (नेप्से) परिसूचक दोहोरो अंकले घटेको छ। बजार मापन गर्ने नेप्से परिसूचक २१.१५ अंकले घटेर २,६६३.१८ बिन्दुमा झरेको हो।

आज ठूला कम्पनीहरूको कारोबार मापन गर्ने सेन्सेटिभ परिसूचक २.६६ अंकले घटेर ४६७.९६ बिन्दुमा पुगेको छ। फ्लोट सूचक १.४० अंकले घटेर १८३.३३ र सेन्सेटिभ फ्लोट सूचक १.०८ अंकले घटेर १५८.५७ बिन्दुमा कायम भएको छ।

सोमबार बजारमा १ करोड ७ लाख ६१ हजार ३९६ कित्ता सेयर ४ अर्ब ७ करोड ८ लाख ५३ हजार ६१० रुपैयाँ बराबरमा कारोबार भएको नेपाल स्टक एक्सचेञ्जले जनाएको छ।

नेप्से दोस्रो पनि आज घटेको छ । साउन १८ नेप्से ४.६४ अंकले घटेको थियो भने साउन १९ गते नेप्से थप २१.१५ अंकले घटेर २,६६३.१८ बिन्दुमा पुगेको छ।

आज कारोबार भएका १३ वटै उपसमूह ओरालो लागेका छन्, जसले बजारमा व्यापक बिक्री दबाब देखिएको संकेत गरेको छ। कारोबार भएका कम्पनीमध्ये ५९ कम्पनीको सेयर मूल्य बढ्दा २१३ कम्पनीको मूल्य घटेको छ भने ५ कम्पनीको सेयर मूल्य स्थिर रहेको छ।

आज एभरेष्ट कलर लिमिटेड, खानीखोला हाइड्रोपावर कम्पनी र जोशी हाइड्रोपावर कम्पनी का लगानीकर्ताले सर्वाधिक कमाएका छन्। विपरीततर्फ सप्तकोशी डेभलपमेन्ट बैंक, केबीएल डिबेञ्चर र गुडविल फाइनान्स लिमिटेड डिबेञ्चरमा लगानी गर्नेहरू सर्वाधिक घाटामा परेका छन्।