हामी सबैकाे संसारन्यूज

स्याङ्जा । स्याङ्जाको गल्याङ नगरपालिकामा बाघको आतंक बढ्दै गएको छ। साउन १८ गते राति भएको आक्रमणमा बाघले ९ वटा बाख्रा खोरमै मारेर छाडेको भने एउटा बाख्रा बोकेर लगेको हो ।

घटना गल्याङ नगरपालिका–५ रुपखानी नेवारडाँडा निवासी श्याम रानाको बाख्राको खोरमा सोमबार राति भएको हो। बाघले खोरभित्र रहेका साना–ठूला बाख्रा तथा बोकामाथि आक्रमण गरी क्षतविक्षत बनाएको स्थानीयले बताएका छन्। प्रारम्भिक विवरण अनुसार घटनाबाट करिब १ लाख ५० हजार रुपैयाँ बराबरको क्षति भएको छ ।

घटनापछि इलाका प्रहरी कार्यालय जैपते, स्याङ्जाबाट प्रहरी टोली घटनास्थल पुगेको छ। प्रहरीको रोहबरमा स्थानीय मुचुल्का तयार पारिएको र घटनाबारे थप अनुसन्धान भइरहेको स्रोतले जनाएको छ।

एकै रातमा यति ठूलो क्षति भएपछि स्थानीय किसान चिन्तित बनेका छन्। यसअघि बाँदरको आतंकबाट खेतीपाती जोगाउन संघर्ष गरिरहेका किसान अहिले बाघको आक्रमणका कारण थप त्रासमा परेका छन्। स्थानीयले वन्यजन्तुको बढ्दो गतिविधि नियन्त्रण गर्न तथा प्रभावित किसानलाई उचित क्षतिपूर्ति उपलब्ध गराउन सम्बन्धित निकायसँग माग गरेका छन्।